您的位置: 首页/八友集/竹升自強 學好華語有著數

竹升自強 學好華語有著數

Aug 9, 2018, 02:15 AM

  “呢度係美國,我唔識聽西班牙話,講英文。”較早前有個美國人喺間墨西哥餐館食餐,聽見企枱同一枱亦係墨西哥食客用墨語語交談,唔知黐咗邊條根,竟然用帶有歧視性言語鬧爆嗰個企枱。究竟係美國講自己母語嘅人多唔多,係咪應該受到歧視?據華盛頓智庫移民政策研究所調查所得,目前美國人口中有4400萬人在外國出生,相當於總人口13.5%,其中22%居民喺屋企唔講英文,而講西班牙話最普遍。又如果以州別嚟睇,5歲以上而且喺企唔講英文嘅,內華達州嘅比率最高,為31%;其次係佛羅里達州嘅29%。原因相信係呢兩個地方近住南美國家,西語裔移民較多之故。

  我哋華人又點呢?據八友呢幾十年來嘅體驗,早期華人移民係台山,佢哋嘅言語就係台山話,因此,佢哋同喺美國出生嘅仔女講台山話,當兒女長大,喺社會做事,就係講英文,但同唔識講英文嘅華人交談,你講國語又好、廣府話又好,佢哋都係盡量講台山話,夾雜英文同你交談,希望你明白。記得有次醫生協會開記者會,有個“竹升”醫生爆出一句“嗰啲黑鬼”,有行家提醒佢小心用詞,佢先醒起話“鎖你”。呢4個字點得嚟呢?就係來自佢哋嘅父母,細個時候聽得多,長大後往往唔覺意講咗出嚟。八友一對仔女喺唐人街長大,喺屋企聽嘅都係廣府話,又睇香港電視劇,自然會粵語,而且好流利。但八仔有4年喺上州賓咸頓大學讀書,讀完之後,廣府話忘記好多。佢結婚之後,老婆係台灣人,講國語,佢唔識,兩夫婦就唯有講英文,兩八孫出世後,自然講嘅就係英文。八仔、八媳則努力教兩個小朋友講粵語同普通話,可惜無乜成效,不過,佢哋都大慨聽得明廣府話,算係唔錯。母語不可忘,八友認識好幾個第三、四代“竹升”,佢哋學功夫之餘,仲盡力去學華語。華人當自強也。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版