您的位置: 首页/八友集/粵唱粵好 支持粵曲考級試

粵唱粵好 支持粵曲考級試

Aug 8, 2018, 02:45 AM

  粵劇曾經被視為老古董,一般後生仔女拒絕接受。不過,自從粵劇申請成為世界文化遺產成功之後,粵劇再度抬頭。嗰日睇電視台介紹,原來香港有班年青人鍾情粵劇,拜師學藝,話要繼承前輩遺志,肩起發揚粵劇嘅責任云云。而最近,香港粵劇學者協會同英國西倫敦大學倫敦音樂學院合辦全球首個“粵曲考級試(演唱)”。“粵曲考級試”首席考官阮兆輝接受訪問時說,會先推出一至五級考試作嘗試,預計兩年幾之後先推出六至八級考試。佢又話,考級試能推動坊間粤劇導師增值,而依家業界表演者則唔駛接受考核。阮兆輝指出現今有唔少粵曲導師,但質素無法認證,推出考級試後,若有粵曲學生無法成功考級,或能推動其導師自我增值。

  八友問准備呢個月18同19日喺中華公所開“良辰美景詩韻傳情”粵曲演唱會嘅詩平對“粵曲考級試”有乜睇法。佢以為叫佢番香港考試,立即說“嘩,我哋都超齡啦!”“你唔駛咁謙,自己都係導師級啦!阮兆輝都話依家嘅表演者唔駛考咯。”詩平話支持“粵曲考級試”,可以提升唱粵曲嘅人更大興趣。八友自細鍾意聽粵曲,讀小學時番上午班,下午做用功課後就聽香港電台嘅粵曲節目,聽得最多嘅係鍾雲山、崔妙芝、冼劍麗。估唔到喺美國認識咗鍾雲山,可惜約10年前佢回歸香港,冇耐以逾90高齢去世。或問八友識唔識唱,要唔要參加“粵曲考級試”?“梗係識,但只限於冲涼時自己唱俾自己聽。”八友覺得,華僑社會咁多粵曲社,咁多人鍾意唱,何不由幾個喺呢行名望高嘅專業人士搞番個“粵曲考級試”,以便五音不全夾硬上台獻唱嘅人的起心肝改善佢哋嘅唱腔吖嘛!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

NYC VOTE
关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版