您的位置: 首页/八友集/毋忘國恥 抗日紀念應多辦

毋忘國恥 抗日紀念應多辦

July 9, 2018, 01:55 AM

  禮拜六嗰日下午,八友喺中華公所樓下睇粵劇演出嘅海報,一個30餘歲靚女走過嚟問:“七七事變紀念活動喺眯喺中華公所舉行?”“我冇聽講過喎!”八友諗咗一輪,真係唔知。“有朋友講俾我聽,話今日有呢項活動,我諗梗係喺中華公所嘞!咪過嚟想睇下歷史圖片囉!”“唐人街就冇,會唔會喺法拉盛嗰邊呢!皇后區台灣同胞比較多啲。不過,我日日留意僑界新聞,真係冇呢種印象,可能你嘅朋友想當然囉!”“我諗都有呢種可能。我以為咁重要嘅歷史,社區會有紀念活動。”閒談間,中華公所主席助理戴日基喺二樓行落樓,問佢知唔知有冇“七七抗戰”81週年紀念活動。戴生話冇印象,據佢所知係冇。

  八友喺唐人街做採訪三四十年,抗日戰爭如“七七事變”、“九一八事件”等歷史事件,華埠社團間中會舉辦紀念活動,提醒年青一代華裔毋忘國恥。乜時間會辦呢?應該係五同十嘅數字。最熱心辦嘅係林則徐基金會主席黃克鏘、美東國民黨常委張學海,但前者養病,後者移居西岸,近幾年來,“唔好忘記日本侵華”活動已經少見。唔單只海外華僑社會,據知連台灣都係咁。八日閱報:國民黨退役將領蘭寧利感嘆,台灣“去中國化”蔚然成風,依家喺台灣已經冇幾多人會記得“七七”同“蘆溝橋”,有嘅只係媚日之風。而早前曾訪問大陸嘅國民黨退役將軍郝柏村說,抗戰嘅歷史真相係中華文化最寶貴、最有價值嘅部分,中華民族世世代代都應知道抗戰對中華民族復興、以及中國今天喺國際地位嘅影響。兩位老將肺腑之言,蔡英文等民進黨人,當然聽唔入耳矣!因此,海外華僑社會有必要每年舉辦抗戰紀念活動也。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版