您的位置: 首页/八友集/咬人耳仔 餐館惡客發爛渣

咬人耳仔 餐館惡客發爛渣

July 7, 2018, 02:05 AM

  八友以前做企枱時,見過唔少挑剔又麻煩嘅顧客因為食物唔啱或價錢問題提出投訴,遇到咁嘅人,只好通知“黑衫”(経理)搞掂。有時呢類客人不依不饒,店家多數自認倒霉,但亦有各不相讓,幾乎大打出手亦有之。日前睇到一段新聞,橫蠻無理嘅女客竟然動囗咬人:事件發生喺密歇根州克莱门斯山一家中餐店内,一名年輕女子对自己点嘅菜好唔满意,首先将食物丟喺地上,又同餐馆老板吵大鬧。點知咁仲唔算,條女猛扑上去,一口咬住店主耳仔,扯甩一小块肉。店主個仔上前想番勸架,俾惡女一巴星落去,然後逃之夭夭。店方冇理由啞忍,報警處理,嗝日警員將惡女逮捕。店方會否要求賠償,唔知。

  咬耳仔,通常係情侶先至有嘅親動作。未必,惡向膽邊生嘅人亦會動口咬人。例如拳王泰臣,有俾對手辣撻打法撩起把火,見對方又將個頭頂過來,不禁怒從心上起,一啖噬向對手耳仔見紅。又如依家喺俄羅斯踢緊世界杯嘅烏拉圭名將9號仔“牙擦蘇”,前兩屆世界杯比賽中,一啖咬落對手膊頭,其後遭到重罰。上述女惡客可能係泰臣、牙擦蘇嘅粉絲,趁住世界杯賽事期間,向兩大運動員致敬。

  有主張“和氣生財”嘅餐館佬說,做呢行,顧客第一,蝕底多少,冇問題嘅。但一個喺唐人街做企枱嘅朋友明仔則不以為然,話有啲客仔衰到冇影,你退一步,佢進一尺。佢就曾經遇過一個撩事斗非嘅客仔,對方竟然說:“信唔信我轉頭響低你。”佢唔知真定假,即時向“出嚟行”(黑道)嘅朋友攞咗一支槍傍身,必要時同對方死過。好彩嗰個客真喺靠嚇,否則又多一段大新聞。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版