您的位置: 首页/八友集/名廚自殺 飲食界再無伯樂

名廚自殺 飲食界再無伯樂

Jun 14, 2018, 01:31 AM

  蘇東波有名句:“但願生兒愚且魯,無災無難到公卿”。無奈之情,溢於言表。的確,有時候叻嗰個死嗰個。近日,美國就有兩個叻人疑因抑鬱症而自戕身亡。一個係纽约知名品牌皮包、女鞋、服装、配饰设计师Spade,被发现死于纽约曼哈顿佢自己屋企,据講係用圍巾吊頸,现场仲留有一封遗书。隔冇兩日,61歲知名主廚、主持人Bourdain喺法國一個小鎮自殺死亡,據講亦係吊頸,搶救無效,去咗見上帝。Spade喺時裝界大名鼎鼎,身家以億計,但打唔過攞命嘅抑鬱病。唐人對呢位女士所知唔多,但對Bourdain,鍾意睇美食節目或者喜歡飲食嘅人,都知道呢位吃界名人不但曾經走訪過包括香港人、台灣等世界各地,介紹美食,更喺唐人街、法拉盛訪問唐餐館,而只要一經佢評點,分分鐘“一登龍門,聲價十倍”。難怪聽見佢離世消息後,大細餐館老板均跌足嘆曰“從此無伯樂矣!”

  “民以食為天”,點樣食好嘢,邊度有好嘢食,喺人都想知道,而Bourdain嘅飲食旅遊節目就向觀眾作出詳細介紹,睇靚景之餘仲可以知道世界各地美食,所以,佢嘅節目受到觀眾歡迎,八友都經常收睇,最深印象喺年前奧巴馬訪問越南時,同佢喺一間小食店吃麵、小酌。而Bourdain嘅訪問對象,上至六星級食府,下至大排檔,最欣賞佢喺香港、澳門坐喺食攤嘅塑膠櫈仔篤食豬腸粉、牛什、嘆啤酒,無拘無束,將佢同觀眾之間嘅距離拉近。如果讀者有留意,會喺紐約市幾間都幾出名嘅中餐館見到Bourdain用餐或同員工合影嘅照片,唔好睇少呢啲相片,乃係店嘅生招牌,會為店內帶來生意。就好似30年前,有某著名主流雜誌,時不時派美食家到唔同餐館試食,然後寫心得評分,能夠得到佢俾三粒星,閣下就發達矣!因為唔少老外都係睇該雜誌介紹而上門幫襯也。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版