您的位置: 首页/八友集/教壞學生 賭馬校長炒魷魚

教壞學生 賭馬校長炒魷魚

Jun 9, 2018, 02:19 AM

  日前同幾個麻雀友飲完茶,准備到同鄉會攻打四方城,其中一個叫“馬王”嘅突然改變主意,話今日有“心水馬”,都係去馬場搵食好過“打劫”老友。八友等冇法,只好再去湊過腳。講起賭馬,布朗士有個正職係一間小學校長嘅賭馬高手早前炒魷魚,每年13萬銀嘅薪水就咁無咗。不過,佢可能覺得賭馬贏嘅錢比薪水仲多,反而益咗佢唔駛教學咁困身。

  呢個叫Schwartz嘅校长喺舊年至今年5月至少发送过25条推特,講自己赌马经历,佢经常利用教学日嘅朝早或晏晝全程跟踪赛马进程,佢甚至仲撰写博客来预测赛事结果,并向其他赌友提供建议。同时,佢又係馬主,估計佢係個“有米”(有錢)之人,因為佢經常話自己喺學校做校長,捱份年薪13万3千元嘅“牛工”,少咗好多時間賭馬贏錢,好唔抵。“唔想撈就走啦!契弟,咪阻住個地球轉。”学校嘅幾個老师決定踢走呢個另類校長,聯名舉報。於是,纽约市特别调查局進行調查。有贓有證,Schwartz、學校同時得到解脫。

  八友廿幾年前,都時不時會到外圍馬投注站(OTB)試下手氣,自己鍾意“刀仔鋸大樹”買冷馬,特別喺三重彩,總希望兩蚊買中兩三千銀。唔好以為冇可能,有時又真係買中,一年之中會有十次八次買中千零蚊。當然,冇話時時咁好彩,但買中一次都有排玩。終於係1998年覺得嗮精神同時間,決定戒賭馬。後來州、市政府因利益問題反面,OTB喺15年前關門,自己更唔駛心思思。依家想賭馬,要到亞古德、貝滿馬場了。有時喺唐人街,會見到幾個馬友喺馬場盡興而返。問“舟車勞頓,唔攰嘅咩!”“此中樂,不可言喻。”難怪有人校長唔做矣!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

NYC VOTE
关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版