您的位置: 首页/八友集/唔駛勞氣 電話詐騙幹理良

唔駛勞氣 電話詐騙幹理良

May 17, 2018, 01:27 AM

  “你去死啦!杏加橙。”日前八友喺同鄉會跟鄉里攻打四方城,隔離枱嘅群姐接聽一個電話後,破口大罵。“邊個激親你呀?咁大火氣。”“又咪係領事館打嚟囉!仆街,每個禮拜都接幾次呢種電話,咁多人死都唔見佢去死。”“群姐,係冒充領事館打嚟嘅電話,唔係領事館,要搞淸楚。”八友忍唔住笑着更正。“哈!你話啲騙徒點知你嘅電話呢?”有雀友說。“可能啲仆街亂咁撥,我唔好彩俾佢哋揀中,明知我唔上當,都唔好成日打嚟啫!搞到我火都嚟埋。”“機器都冇性嘅,點會知呢!慳番啖氣啦!”“唔得,我要換電話號碼。”“你換得幾多次呢?”

  八友較早時收到朋友寄嚟嘅一個視頻,有人按騙徒嘅指示同對方聯絡,一個女人接聽,聽咗幾句後,問姓名。“我姓幹,叫理良。”“什么?”“叫幹你娘。”女方知道“幹你娘”有備而來,回罵:“操你媽。”“來呀!我操你媽。”騙徒接著收線。八友亦接過幾次騙徒電話,幾年前有個自稱客家佬打嚟,話同朋友喺地盤工作掘地時,發現金礦。八友唔等佢講落去,就祝佢發達脫貧,然後收線。最近亦接過兩次冒充中國領事館打嚟嘅電話,費事勞氣,直接收線。呢種騙徒,可謂無孔不入。因為今個月五分局警民例會,局長吳銘恆就講,歹徒竟然將電話打到五分局,可說膽大包天。佢又話有個唐人女人被騙徒呃咗近12萬元,一個月後先至報案,警方欲追無從。八友認為,有關司法部門唔通唔理呢種無日無之嘅騙案?因為唔係個個好似八友咁醒目架嘛!呼吁民意代表為民請命。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

NYC VOTE
关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版