您的位置: 首页/八友集/滄海桑田 唐餐館舉步維艱

滄海桑田 唐餐館舉步維艱

May 15, 2018, 00:48 AM

  《僑報》日前介紹百年前紐約市唐人街酒樓,包括萬里雲、旅順樓同探花樓。呢三間當年華埠高檔食肆已成滄海桑田。不過,探花樓三四年前喺宰也街原址已經悄然復制開張,想來係經營者想借其名氣喺飲食界創出一片天。據講,目前嚟睇,頗為成功,前總統克林頓今年初曾經前往幫襯。成龍幾個月前到訪紐約,中華公所顧問陳玉駒掌珠係成家班僱員,陳顧問喺唐人顧客較少嘅探花樓宴請成龍,聽講一杯果汁都要十幾蚊,其他食品價格,可想而知。

  四五十年前嘅唐人街餐館,依家剩番幾多間?一隻手屈指可數。八友1973年移居美國時,旅順樓仍在勿街7號,有幸喺僑社春宴時,老爸帶去喫過一次,聽說每席80元,菜式大件又抵食。不過最有印象嘅係食具,無論盤碟羮碗都厚過依家嘅兩倍,話打唔爛喎!可惜,無耐旅順樓就閂門退休。當年可以擺酒開筵嘅華埠酒樓仲有讌樂、台灣等幾間,但空間有限,只可以開十圍八圍,因此賓客多嘅主人家要分開幾間餐館擺酒,新娘新郎穿街過巷敬酒。嗰陣時嘅食物特色就係夠大夠多,好似牛肉丸,每粒大如乒乓波,糯米雞用錫紙,腸粉皮厚過乜,但味道不敢恭維。

  八友數下依家嘅當年舊餐館,依稀記得仲有華南、合記、美麗華等少數幾間。當時燒臘最好嘅係金華、旺記,金華嘅老闆娘肥肥就係靠燒鴨買田買地。旺記嘅叉燒最出名,其後旺記嘅夥記1978年出嚟開大旺,一路旺到依家。至於包點,擺也街有間金門,鳮尾包、叉燒包,遠近馳名。後尾竭業,制包師傅過檔美麗華,生意好到現時,“麻雀雖小,五臟俱存”,食品多元化嘅人人冰室及雲呑麵最佳嘅竹林餐館,可惜先後停業。唐人街嘅大型酒樓銀宮,喺1975開張,可以筵開近百席,其後第一酒樓、洪順酒家、美麗宮酒樓、怡東酒樓等陸續出現,二三十年前為食客提供了美食。但現在基於某些原因如交通不便,華埠飲食業,舉步維艱。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

NYC VOTE
关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版