您的位置: 首页/八友集/驕橫跋扈 「我爸係李剛」死梗

驕橫跋扈 「我爸係李剛」死梗

May 14, 2018, 01:40 AM

  作為一家之主,最怕係“不賢妻,不孝子,頂趾鞋,無法可治。”大韓航空主席兼執行長趙亮鎬就係人板,佢日前抵受唔住壓力,宣佈辭職。原因係俾自己老虎乸同兩個野蠻女拖累。先係佢個大女趙顯娥2014年由紐約甘迺迪機場搭機返首爾時,因為空姊將一包夏威夷豆直接拎俾佢而冇倒係碟子裡而發爛渣,逼艙長下跪,要將飛機駛番停機坪。因影響飛行安全,最後被輕判社會服務。跟住喺上個月,第二千金趙顯玟喺一場商務會議中,竟然將一瓶裝水丟向一個員工臉部。事件曝光,引民情激憤,趙亮鎬睇落唔對路,乃“揮慧劍,斷親情”,日前宣怖撤除趙顯娥同趙顯玟所有職務。點知衰起上來有紋有路,佢老婆李明姬被爆涉嫌喺首爾屋企裝修時毆打工人,警方要調查真相。喺四面楚歌聲中趙亮鎬10日宣佈辭職。

  行到冚家炒魷魚呢一步,事情會唔會暫告一段落,民眾會放趙家一馬呢?相信唔會,因為韓國人嘅做事規矩係去到盡,你睇包括樸覲惠在內嘅多任韓國總統就係咁,總統又點,天子犯法都與庶民同罪,就算“你爸是李剛”,一樣冇面俾,何況區區一個大公司嘅執行長。如果再敢“阿吱阿佐”,告埋趙亮鎬一個管教不嚴罪也。友人大隻講話大韓航空搞得咁大鑊,佢覺得錯不在趙亮鎬,乃係佢老婆自恃係韓航太上皇,驕橫跋扈,溺愛一對女兒。“三個女人一個墟”,佢哋凡事以自己為先,稍不如意,就攞人嚟出氣,故此先後出現“打人門”、“堅果門”同“潑水門”事件。身為一家之主嘅老趙只好“壯士斷臂”,希望以冚家辭職嚟平民憤。八友想起周前紐新港務局一個女委員喺一單車禍中“串”辦案警察,上演洋板“我老頂係李剛”,佢隔日即自動辭職。又早前喺大陸亦有個女人上演女板“我老公係李剛”,仲掌摑辦案民警,後來佢老公被拖累炒魷魚。依家拍視頻放上網鬼咁容易,警告自以為有靠山者唔好以身試法,否則累死自己人。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版