您的位置: 首页/八友集/特金相睇 帶上喬丹有意思

特金相睇 帶上喬丹有意思

May 12, 2018, 02:29 AM

  特朗普同金正恩呢對歡喜寃家“相睇”地點終於塵埃落定,就係面面俱圓嘅新加坡。點解呢個地方幾乎仲細過香港嘅小國會雀屏中選?八友一位來自新加坡嘅朋友話一啲都唔出奇,因為新加坡係中立國,有“亞洲瑞士”之稱,有關當局執法甚嚴,唔小心隨便丟垃圾都會被罰掛牌掃街,因此治安甚好。而且辦過幾次領導人見面大會。好似2015年習近平同馬英九歷史性會晤,就揀咗新加坡,相當成功。相信係基於呢個原因,華盛頓、平壤都同意會面地點。“韓國同蒙古都呷曬醋啦!特別係文在寅,以為板門店會攞威,點知會輸俾獅城,文先生有成年都瞓唔著覺。新加坡總理李顯龍早排家事問題搞到焦頭爛額,今次攞彩,補番數。”

  大家有冇去過新加坡?八友喺2016年跟團遊東南亞,先去泰國玩咗4日,跟住到新加坡,因為地方細,只遊一天,除自己外,仲有一對來自溫哥華嘅夫婦。導遊見人少,冇乜小費,欺客,只帶去睇下幾個景點,植物園同夜晚嘅燈光騷,唐人街都係只經過而不入門,相當冇癮。對新加坡嘅感覺就係熱、車多人多,似足香港。不過,八友每年同龍形拳館買獅頭鑼鼓,就一定向新加坡嘅龍獅制作公司訂購,價錢唔係貴,手工甚佳,一個獅頭就算經常使用,都可以用兩年,甚為抵玩。講番即將登場嘅“特金會”,國際均寄予厚望,希望老嘅、後生嘅坦誠相對,為世界和平著想,所有問題,唔啱講到啱,一笑泯恩仇,世界拍掌。八友又建議特朗普不妨帶埋“籃球之神”喬丹一齊去新加坡。因為聽講金正恩喺瑞士讀書時最迷NBA,係芝加哥公牛隊擁躉,並且係喬丹嘅粉絲。總統先生,不妨問問喬丹先生。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版