您的位置: 首页/八友集/ 傳宗接代 家庭倫理非老土

傳宗接代 家庭倫理非老土

Apr 17, 2018, 01:07 AM

  日前到老馮會計事務所報稅,一個年過六旬嘅女士一邊提供資料一邊鳮啄唔斷講自己故事:“我本來唔想結婚,諗住一個人逍遙自在生活,點知35歲遇到個男人,咁就沖咗個頭埋去,後來仲生咗個女。以為安樂過埋下半世,唔知係咪大家都對家庭觀念淡薄,最後都係離婚收場。依家個女有自己嘅家庭,自己孤零零一個。唉!人生都係咁啦!係呢!老先生,你咁後生,結咗婚未呀!駛唔駛我同你做媒人?”

  老先生並非年紀老,而係佢姓老。呢個半“竹昇”說:“多謝夾唔該,我已經結咗婚,有個6歲大嘅仔。”“睇唔出喎!係呢,你結婚係想搵個老婆,抑係想有個家庭?”“我好鍾意睇中國歷史言情小說?!形成我有好重嘅家庭倫理觀念,因比好想有個溫暖家庭。”“依家你咪有囉!睇你好似精神唔多夠喎!每日瞓幾多個鐘呀?”“我仲有另外一份工。總之每日要做成16個小時,要照顧家庭,又要睇住父母。好似阿媽聽日返香港,我都要同佢跟手機票。每日有得6個鐘頭俾我瞓已經好好彩。OK,你份稅表搞掂。八友,到你。”

  八友同阿老相識多年,第一次聽佢剖白心中情。呢個世代,好少人好似佢同八仔咁注重家庭氣氛。

  有個朋友有三個女,先後嫁人多年,但沈醉於二人世界生活,懶理四個老人家催生,唔要小朋友,話唔想陀手拎腳,激到四老吹鬚碌眼。當然,後生仔女有佢哋諗法。但當佢哋年老力衰,你眼望我眼都係四隻眼,其寂寞境況,可想而知。特別有乜頭暈身熱,想揾人照顧都難。到時後悔已遲矣!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版