您的位置: 首页/八友集/執定唔執 中華英文等投票

執定唔執 中華英文等投票

Apr 16, 2018, 01:56 AM

  八友日前寫咗一篇有關市府有意削減英文班撥款,社區相關人士發動請願要求繼續俾錢開班同埋中華公所英文班何去何從嘅文稿,引起華埠熱議。嗰晚,八友應開平同鄉會主席鄧學源之邀,參加佢哋春節聯歡暨敬老餐會。中華公所主席伍銳賢拉住八友,輕嘆一聲:“英文班真係冇得做,2010年到依家,中華蝕咗成7萬銀。但正如你所講,申辦唔易,執咗可惜。所以,我會喺常務會議提出討論,等常務議員投票表決英文班要抑係唔要。”

  八友奇怪咁多新移民,佢哋都需要學幾句英語作日常生活之需,點解上世紀八九十年代,中華公所英文班有成幾百人就讀,依家只得二三十人,真係諗極都唔明。伍主席說,因為當年唐人街車衣廠多,餐館興盛,皇后區同布碌侖嘅新華埠仲未出現,新移民學英文一定係唐人街,所以中華公所英文班咪唔愁冇學生囉!但依家情形你哋都睇到,唐人街經濟差,衣廠得嗰二三十間,免費英文班幾個區都有,試問中華英文班邊有得搞?八友茅塞頓開:“唔講咯!點解唔見聯成公所主席黃達良到嘅?”“唉!你明啦!”

  收費英文班難辦,一句講嗮,經濟唔好,打垮所有行業。嗰陣時,唐人街衣廠近500間,餐館、超市起碼過400家,每逢禮拜六、日同假期,美東地區各地華人以朝聖心態到唐人街購物喫餐。但時至今日,大家都有眼睇,唐人街艱難渡日。新移民想學英文,自然會搵服務機構開辦嘅英文免費班,收錢嘅學習班自不然凋,就連以服務華人為目的嘅中華公所亦不能幸免,明知要蝕,都要咬牙辦落去。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版