您的位置: 首页/八友集/ 臉書係乜 耆英抗拒新科技

臉書係乜 耆英抗拒新科技

Apr 14, 2018, 03:01 AM

  大家知唔知“臉書”(Facebook)係乜?相信好似八友呢種上咗年紀嘅人都未必個個都知,因為八友都冇玩呢種高科技事物。唔信?睇下我哋嘅國會議員咪知囉!臉書執行長扎克柏格(Mark Zuckerberg)連續兩天接受國會議員質詢,呢位後生仔兵來將擋,水來土淹,全身而退。美國好多媒體用“損傷全無”形容扎克柏格喺參院嘅聽證會表現,原因係44個參議員質問成五粒鐘都把握唔到重點。有線電視新聞網更指出,提問嘅參議員多數自己根本不了解臉書運作、唔知道問題解決方案,甚至唔清楚除咗搏版面之外,將扎克伯格叫來作證係為咗達到乜目標。參議員對臉書了解唔多,以至扎克柏格可以迴避冇回答嘅重要問題。

  友人大隻講說:“真唔真呀?我自己唔係老番又一把年紀,唔識臉書,都情有可言啫,身為國會議員,讀咁多書,無理由對臉書蒙查查喎!”八友則認為一啲都唔出奇,因為上咗年紀嘅人,對新事物都有一定嘅排斥性。好似八友咁,20年前連上網係點都唔知,同時有抗拒意思,覺得自己用紙寫稿咪得咯,堅決唔學電腦。後來報社決定要記者用電腦寫稿傳稿,冇辦法,唯有學用電腦,先至懵懵懂懂學識基本功,至於臉書等,仔女肯教,自己則以“唔想曝光”為由拒絕。起初以為只有八友咁“唔長進”,原來唔係,幾個同八友咁嘅年紀,英文嘞嘞聲嘅朋友都係咁。例如退休嘅五分局局長助理雷柏銳,警民會議時派發嘅中文新聞稿頗為了草,八友請佢用電腦打字後傳俾記者。“唔識用電腦。”雷公說。“點解唔學?”八友懶叻。“唔鍾意學。”雷公笑都唔笑。唉!新科技真係考起好多長者。當然,仍有唔少耆英孜孜不倦學新嘢,佩服。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版