您的位置: 首页/八友集/ 削英文班 有人歡喜有人愁

削英文班 有人歡喜有人愁

Apr 13, 2018, 01:09 AM

  新移民來到美國,首先要搞定搵食技能,就係學好英文,紐約一直有政府資助嘅英文學習班提供俾新移民。

  不過,據講白思豪市府想削減成人英文班經費。聽到呢項消息嘅紐約市成人英語學習聯盟(NYCCAL)組織不禁大驚失色,因為一旦成事,就有唔少教成人班嘅老師失業。於是,該組織日前班齊人馬去到皇后區公所前集會,敦促市長唔好削減成人英語班經費。喺2019年嘅財政預算中為成人英語班撥出1,200萬美元專項資金。

  據報道,紐約市2019年財政預算並冇包括1200萬元的成人英語教育預算。市議員顧雅明表示成人英語班對新移民來說至關重要,佢哋可以喺呢度學習英語、閱讀同寫作,進而學到適應環境所需嘅一技之長。提供學習場地嘅社會服務機構更聲淚俱下,大聲話“削不得”。

  八友40幾年前初到美國,曾經喺華策會嘅免費英文班學習。該會租用咗依家嘅東安公所三樓做教室,新移民得益不少。所以,八友支持向市府請願人士,衹要白思豪少花一啲無謂錢,1200萬蚊,算得乜呢!不過,係咪個個都好似八友咁嘅想法?友人大隻講話未必,因為民間亦有收費嘅英語學校,假如冇咗免費英文班,新移民唯有去收費英語班學習,係咪?

  八友又想起中華公所嘅英文班,喺1981年千辛萬苦向政府申請成立,旨在服務新鄉里,酌量收費每月20元,約20年前先加到40元至今。但受到政府免費班衝擊,近20幾年來,月月虧蝕,有時每年蝕萬幾銀,若果只虧三幾千銀,中華常務話要劏鳮還神。開常務會議時,幾乎每次都討論要唔要執咗佢。但大多數人都話中華公所以服務為本,執之可惜,更何況公所有的是鈔票,蝕得起啫,最多開源節流,抗戰到底。

  於是,舊年年中閂咗夜班,並聘英文專才黃老師擔任校長,由楊教授輔助。最初有啲起色,但早排唔係好掂,唯有將兩班合成一班,一兩個老師暫時下崗。喺呢個危急存亡之秋,突然傳出市府祭出削英文班嘅大刀,中華公所係咪睇到一點燭光呢?

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版