您的位置: 首页/八友集/ 好心壞事 關愛座變批鬥位

好心壞事 關愛座變批鬥位

Apr 12, 2018, 00:40 AM

  喺美國、大陸、港、台乘搭公共交通工具,每有讓座婦孺、老人、殘障者等嘅標語,但好多時因此發生衝突事件。日前睇新聞,大陸、香港同日先後出現由於讓座不果而導致嘅不愉快事故:北京有男子帶住孫女乘搭地鐵,上車後發現冇位,竟直接叫孫女坐喺一個乘客身上,引起乘客不滿,雙方頂咗幾句,阿爺竟然恐嚇:“你有冇讀過書呀?如果我後生啲就打鬼你。”事件曝光後,網友都睇唔過眼:“活到這把年紀仲講打講殺…真不知所謂。”

  又喺香港:一名吳姓廚工放工後喺銅鑼灣乘坐過海九巴番屋企時坐上關愛座(優先座)上,其後一名林姓男子同老婆,老母、嬰兒等一家上車,林男要求吳男讓座無果,雙方先而口角繼而動武,雙雙中招。九巴車長報警,警方調查後以涉嫌打架拘捕兩人。廚工嘅老婆事後為丈夫鳴不平,指老公因為做工太累先攰到坐喺關愛座位上,并非有意霸位。

  友人大隻講睇完呢兩條新聞,禁不住搖頭嘆息,說關愛座原本係好意,提醒搭客發揮愛心,讓座俾有需要人士, 點知好心往往變壞事,關愛座變批鬥座,相信當初設計之人亦始料所不及。

  八友喺紐約雖然少坐巴士,但坐上去之後就發現有幾個深藍色座位,起初唔知點解,後來聽人講先知係關愛座。上兩個禮拜喺台灣探亲,幾乎日日坐地鐵或巴士,都會發現深藍色座位虛位以待,冇後生仔女坐落去,親家拉八友坐低,笑說“我哋有資格坐”,先醒起自己唔係年輕一族。八友發覺,台灣民眾較有愛心,青年人肯主動讓座俾有需要座位人士。

  記得有個中文電視女記者年前陀住個8個月大嘅BB喺紐約搭地鐵時,抱怨冇人肯讓座,攰到佢幾乎想坐喺車廂地板上。佢問:“紐約人係咪特別冷漠呢?”

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版