您的位置: 首页/八友集/美朝解凍 喬丹最合任大使

美朝解凍 喬丹最合任大使

Mar 14, 2018, 00:28 AM

  北韓領導人金正恩嘅美國老友羅德曼最近又惹麻煩。呢位56歲嘅NBA退役球星,日前竟然飲大咗之後開車,可能係開到舞龍咁舞,俾警察捉到,證據確鑒實,綽號“小蟲”嘅羅德曼(Rodman)承認酒駕,俾法院判處緩刑3年,又下令佢接受9個月初犯者酒駕教育課程。

  羅德曼曾打過NBA幾支球隊,又拍過電影。其中效力芝加哥公牛隊時間最長,喺“籃球大帝”喬丹坐陣下,攞過過5次NBA總冠軍。“小蟲”攞籃板最叻,得過幾屆NBA籃板王稱號。不過,佢打波粗野,有次俾人撞出界外,竟遷怒一個攝影師,一腳伸向對方“小弟弟”,痛到攝影師要抬出場,聽講後來賠咗10萬元了事。 

  友人大隻講奇怪羅德曼酒駕只判緩刑輕罪,會唔會係名人效應呀!八友覺得係,但並非只係球星、明星之效應,而係因為佢同金正恩稱兄道弟。“火箭人”登位後冇耐,羅德曼曾經率領幾個過氣NBA球員到北韓打友誼賽,受到金正恩接見,“小蟲”仲肉麻高唱“生日快樂”。返美之後又講可以做美朝溝通橋樑,不過冇人理佢。依家金正恩邀請寃家特朗普喺5月前見面,美朝和解似有轉機,既然“小蟲”係“火箭人”兄弟,俾下佢面,判緩刑算啦!

  大隻講笑八友異想天開。佢話睇過新聞,金正恩上世紀九十年代中期留學瑞典時,係NBA迷,特別鍾意公牛隊嘅喬丹。“美國應該請喬丹做美朝橋樑大使就真。”八友則認為喬丹唔會接呢個燙手山竽。依家佢坐擁十幾億身家,又係黃蜂隊老闆,點會冒險入朝,一個唔好彩,做咗披頭四嘅約翰藍儂第二,豈非死得寃枉。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版