您的位置: 首页/八友集/茶費收足 酒樓紙巾限一張

茶費收足 酒樓紙巾限一張

Mar 12, 2018, 01:17 AM

  八友約朋友飲茶,多數喺東百老匯或者地威臣街嗰兩間酒樓;一來貪就腳,二來點心唔差,特別係後者,碟頭夠大,斤両十足,而且免茶,如果十個八個友朋飲茶食點心,就慳番成十蚊,小數怕長計,所以呢間做街坊生意嘅食肆,早午茶市,一定爆棚。若論點心,東百老匯嗰間稍勝一籌,但數年前酒樓董事局召開全體員工大會,下死令唔准企枱同經理免客人茶錢。因此企枱向熟客嘆氣:“唔好意思,董事長、總經理有咁嘅柯打,茶錢照收。但紙巾我可以俾多幾張你哋。”客仔明白,當然唔會怪企枱。不過,以往俾小費大方嘅會唔會俾小啲,難講。

  曾有一段時期,呢間酒樓隻眼開隻眼閉,准許企枱收半價茶費,即係兩人只收一位茶。不過,最近又有變。八友日前同幾個朋友上去飲茶,張枱近住工具枱,旁邊貼出一張告示警告企枱:除咗重申茶錢收足之外,仲要求夥計唔准用碟裝成疊紙巾俾顧客博花利。每個客人只准紙巾一張,如果私自上來攞,企枱有責任開導叫唔好。八友睇完呢段“良心表白”,頗不以為然。資方開源節流,無可厚非,但只准客仔紙巾一張,未免有點那個。例如枱上倒瀉汁液豉油,人客用紙巾鋪上去唔駛咁難睇,又或者食鳳爪鴨腳,一張紙巾點夠抹手抹嘴,豈不是要人客變成污糟貓?八友明白有啲貪心人客將成疊紙巾放落手提袋。但上述規定,對有需要嘅顧客唔公平,店方應該將規矩改一改。例如食到黏手黏腳汚糟貓者可填表申請書俾收銀處,再呈報董事局,一経批准,即可多獲白過白雪僊嘅紙巾一張。然否?

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版