您的位置: 首页/八友集/麵包半價 吼准時間有著數

麵包半價 吼准時間有著數

Mar 10, 2018, 01:48 AM

  嗰日傍晚7點半鐘未到,八友經過東百老匯某麵包咖啡店,見門口有幾個阿伯阿姆排隊,但店內衹有一兩個客人。天氣地凍,奇怪佢哋唔入去而喺外面捱冷。八友心想不如買幾個包點,明天做早餐。入到去, 女店員叫八友買包就排隊。“你哋咁得閒,我駛乜排隊啫。”八友奇怪。“你唔係等買平包咩?”靚女店員笑問。“乜你哋間大寶號都有一蚊兩個包賣嘅咩!”八友知道唐人街有啲咖啡麵包鋪喺黃昏後賣大包,一蚊兩件,或兩件一個兩毛半。時間有啲六點,有啲則7點。“我哋係7點半之後先大平賣,有餡嘅一蚊兩個,冇餡就三個一蚊。你依家出去排隊都得?”“費事囉!俾個肉鬆,一個菠蘿啦!”呢度嘅麵包唔錯,尤其菠蘿包,似足香港,朝早放喺焗爐一分鐘,加件牛油,就係好味嘅“菠蘿油”。

  貪小便仍人之常情,一蚊兩件,雖然唔係十足新鮮,但都係當日製造,是以唔少民眾等到減價時刻先到麵包店去排隊。加薩林街有間包店仲誇張,經常未到5點就有個阿伯企出店外叫賣:“一蚊兩個包,唔買都睇下。”八妻未走時,就時不時喺呢處執幾件包番去。呢半年,星期二、四八友教完學生番歸,都會經過格蘭街兩百幾號某咖啡店,7點半左右,喺該店麺包減價時份,好多時入去買幾件,吞拿魚包、牛角包等一個幾兩件。但如果去佢哋喺包厘街嘅分店,則兩件一蚊,仲平啲。據和,企硬絕不減價嘅餅店亦有好幾間,可能佢哋控制好成本,賣完算數。又或者賣唔嗮寧願丟入垃圾桶都唔平賣。總之,做生意各有各想法,但隔夜麵包應該唔會有人賣,因為入口就知龍與鳳,下冇人幫襯。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版