您的位置: 首页/八友集/ 爭頭炷香 春節許願祈平安

爭頭炷香 春節許願祈平安

Feb 14, 2018, 01:24 AM

  仲有2日就係狗年春節,大家有乜心願就要喺年三十晚大年初一時稟神矣。講起新春許願,想起香港唔少善信都會喺踏入大年初一到黃大僊祠上“頭炷香”,聽講今年黃大僊祠合共有800人可以喺等候區輪候上香。另外,由於電子支付愈來越普及,今年黃大僊祠亦亦趕時麾,開始接受支付寶捐獻。會喺總辦事處提供裝置同埋係園內部分地點設立二維碼,善信可通過香港同內地支付寶程式自己隨心意設下捐款數目捐助。八友喺香港20幾年,始終冇入過黃大僊祠見識過。舊年喺香港旅遊期間,曾經同建華兄到黃大僊訪友,因為趕時間,只喺黃大僊祠前經過,認真係“入寶山空手回”。

  唐人街亦有黃大僊祠,而且曾經有兩個,一個係已故車衣商凌君輝喺1984年專程喺香港“請”大僊到紐約,祠址設於東百老匯,香火頗為鼎盛。凌君輝僊遊後,冇人接手,僊祠關閉。另一僊祠由已故僑商應行久創辦,最早設於披露街,其後搬至包厘夾披露街交匯至今,香火亦盛。聽講,唐人街唔少寺廟都有設“頭柱香”活動,八友有個細侄年年都喺年三十晚喺去慣嘅廟宇等候,搭正12點,同其他善信衝入去上香,等佛祖保估家庭平安大吉。然後到擺也街睇大鵬同鄉會舞麒麟。

  八友又想起1973年1月17月移民到紐約,距離春節唔夠半個月。年三十晚開年嗰日,老爸帶八友到大鵬同鄉會喫團年飯,然後喺會所睇陳泰興、溫志明師傅帶班徒弟表演舞獅、打功夫。因為係喺海外過第一個農曆年,是故特別記得。匆匆45年,唐人街春節情況同以上雖然有多少唔一樣,但仍然熱鬧,只不過少咗“爆竹一聲除舊歲”罷了。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版