您的位置: 首页/八友集/「我必回來」 印度宮番生招工

「我必回來」 印度宮番生招工

Feb 10, 2018, 01:18 AM

  上個禮拜香港歌神張學友喺金神大賭場唱咗兩場,八友荷包乾塘,冇去捧場,但聽講盛況空前,好不熱鬧,臺前幕後超過兩百人,學友仔不愧係當今香港華語歌壇嘅第一人,唱功同臺風令人嘆服。友人賭場常客表示,賭場好耐未見過咁多唐人囉!八友諗下:梗係啦!以前賭場猛請香港大明星、大歌星遠渡重洋來賭場獻唱,無非係想吸引多些華人到賭場聽歌之餘順便俾賭場發下橫財。依家大明星少咗,識唱歌嘅歌星更加係買少見少。當然最重要係更多人荷包唔爭氣,賭場生意一落千丈,搞到呢幾年嚴重不景氣下新澤西州大西洋城5家城賭場執笠。

  賭業仲有冇可能復甦呢?友人大隻講話日前睇到報紙講大西洋賭城,話有好消息,特朗普嗰間泰姬瑪哈陵賭場復活,準備喺今年夏天以硬石賭場度假村之名重新開張,而且開始面試求職者,活動首先針對前泰姬瑪哈陵(印度宮)賭場嘅員工舉辦,大約1600名勞工受邀申請職缺,其中有1400人前去應徵。之後會再向外界招工,總之要皆大歡喜。“新賭場渡假村係唔係總統?”“唔知喎!應該係?!否則點會前朝員工優先。”“咁又係,傳說泰姬瑪哈陵賭場關門前,特朗普套用“未來戰士”嗰句經典臺詞:“我必回來”(I'll be back)。哈!又真係番生喎!”八友自12年前跟龍形瑞獅團去大西洋城舞獅後,至今未曾涉足,一來路途遙遠,二來怕輸錢。但呢些年來剩下一百幾十閒餞,等天氣回暖,不妨入城刀仔鋸大樹。又覺得,賭場如果以渡假形式經營,或可招來四方客也。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版