您的位置: 首页/八友集/ 我要閱兵 特朗普又要攞威

我要閱兵 特朗普又要攞威

Feb 9, 2018, 01:33 AM

  我哋好大喜功嘅總統特朗普最近又有新搞作,就係要辦閱兵活動。事因舊年7月中佢參加法國國慶日閱兵,甚為鐘意。當時佢話係睇過嘅"最好嘅閱兵之一”。既然喜歡,就想到:“我阿美利堅乃世界強中之強,兵力、軍備都係頂呱呱。中國、俄羅斯、朝鮮、法國都有閱兵。我哋美國無理由撬埋雙手睇嘢啫!好,番去籌備閱兵,要威盡所有。”於是特朗普即時向軍方提出要求說:“我需要一個好似法國嗰種閱兵,閱兵係世界上最好嘅軍隊都應該做嘅事。”佢認為美國辦閱兵可以一展強大嘅軍事實力,唔駛俾人譏笑係“紙老虎”。

  不過,想威過威士忌嘅特朗普呢個念頭遭受議員猛烈批評,有人鬧佢想做拿破崙。亦有人話特朗普“大花筒”,因為閱兵要用好多錢,共和黨成日嗌窮,唔肯撥款救濟貧困,但閱一次兵所花費用起碼一千幾百萬,錢從何而來?友人大隻講則表示唔駛擔心,特朗普窮剩幾十億美金,如果政府唔俾,佢自己出又點話。到時軍隊喺佢面前經過,齊喊一聲:“總統好。”佢回番一句:“阿兵哥好。”場面肯定全世界矚目,花“小小錢”買威威,對後世子環都有交代,何樂不為。大隻講又說,但國防部長一定要吩咐阿兵哥到時要聽特朗普指揮。“點解?”“經驗教訓囉!清朝時戰無不勝嘅年羮堯班師回朝,雍正皇帝喺依家嘅天安門前閱兵,見軍容鼎盛,龍顏大悅,又見天時暑熱,乃傳令兵將稍息,但連叫三遍,士兵喐都唔喐。但年羹堯一揮令旗,將兵即時稍息。雍正記恨在心,後尾將年大將軍連降十八級,最後仲賜以斬頭。特、雍性格有相似之處,所以兵頭一定要小心行事。”八友叫大隻講放心,國防部長睇到呢篇“八友集”後,定會銘記在心。“喂!閱兵時間定咗未,到時我哋拉隊去華盛頓睇熱鬧囉!”

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版