您的位置: 首页/八友集/毒打致死 兒童受虐早報警

毒打致死 兒童受虐早報警

Jan 10, 2018, 02:07 AM

  好耐都未試過義憤填膺,最近香港一宗家庭悲劇,就不得不令人義憤填膺。就係一個5歲半女童臨臨一個多月來俾親生老豆同繼母虐待,天天捱打,用拖鞋打面,較剪篤身,藤條都打斷,仲要捱肚餓,終於捱唔住離開世界,結朿幼小嘅生命。死前一日更曾遭毒打拋高十幾次。事件揭發後,老豆同繼母被捕,控以謀殺罪。呢種冷血人魔,如果唔判重刑,天地難容。噚日睇到一篇有份搶救臨臨嘅一個醫護人員寫嘅千字文,八友忍不住眼淚婆娑:“女童除了渾身插滿常見的急救喉管外,瘦弱的身體上,無一不是受了長期虐打導致不同程度的瘀傷;四肢、臉上都是流血過後的結焦;腳底卻有着老人常見的深黑色壓瘡;高高鼓起的肚子,顯示出長期營養不良而導致的腹水……天啊!”文中又提及“面對老年的逝者,是解脫,面對年輕的逝者,是惋惜;面對目前我所遇過最年幼的她,對不起,哥哥姐姐們救不了你。”曾嘗試替死者闔上眼睛,卻闔不上。

  讀文至此,稍有良知之人,當會黯然悲嘆!後母虐待繼子母嘅事件時有所聞,但由親生老豆親自執行虐打行動,簡直令人髮指。新聞報導話係後母從旁挑撥所至,但係自己嘅骨肉,點落得咁嘅毒手?一言蔽之,冇咗人性,已屬禽獸行為。因為呢件事,八友想起紐約嘅華人家庭針對兒童嘅家暴問題。有啲華人小朋友番學時被老師發現身上有瘀傷報警,於是父母被拘控,小朋友被兒童局接手,或送至領養家庭。八友經常跑呢種新聞,有時心想“兒童局矯枉過正”。但睇完臨臨小朋友死訊,八友覺得有收回“兒童局矯枉過正”呢句話嘅必要。因為兒童局如果唔咁做,可能會小臨臨事件重演。八友曾經喺中華公所門口見到一個華人女家長接兒子放學時,可能兒子扭下計,佢媽咪竟一巴掌打到小朋友趴倒在地,毒罵“冚家鏟”不已。如果當時有警察,她肯定“扑街”。俗語話“拳頭出孝子”,父母們切勿被誤導,子女唔聽話,要循循善誘,細力打下手心OK,否則閣下“吃不完兜著走”。


本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版