您的位置: 首页/八友集/敗中求變 棄商從藝終出頭

敗中求變 棄商從藝終出頭

Dec 7, 2017, 01:35 AM

  細侄女阿怡最近又轉工,係佢今年以來第三次轉換工作環境。不過,每轉一次工,薪水就跳一跳。呢位侄女自細有創作設計天份,細個時畫畫,似模似樣。大學時八友曾建議佢讀藝術學校,但佢父母話唔好,藝術好難搵食。八友笑說梵高、畢加索、齊白石、張大千等嘅畫作依家閒閒地一億幾千萬,繪畫有機會發達。“有幾多個梵畢齊張?算啦!”結果阿怡讀咗商業專長學校布魯克學院。

  畢業後,阿怡揾到間日本貿易公司做文員,年薪三萬幾。後來轉到另一間日企,薪水差唔多。佢見係咁落去冇乜出路,於是一咬牙,花8000大元去學網路廣告設計。讀完之後,幾經辛苦先至喺大公司運通搵到一份短期工,當然係一邊做一邊搵。冇耐轉到威歪神大電訊公司,但仍然係短期工。三個月前,皇天不負苦心人,曼哈頓中城有間醫院請佢做長工,一問薪水,院方問“9萬2000一年如何?”阿怡以為自己聽錯,滿口應承。不過,做落之後,覺得工作環境唔係幾好,而且工作太容易,冇挑戰性,話有機會再轉工。佢老爸則力勸佢一動不如一靜。上個月中,又傳來好消息,阿怡半年前曾經見過嘅某國際性公司話撬佢過檔,薪水又昇咗昇。阿怡決定辭醫院工作,接受挑戰。“我一講辭工,老細當場俾面色我睇,啋佢都儍。”“梗係啦!唔通開個歡送會俾你咩!祝你好運啦!”八友笑說。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版