您的位置: 首页/八友集/誰領風騷 人瑞空姐在美航

誰領風騷 人瑞空姐在美航

Dec 6, 2017, 00:46 AM

  空中小姐,大多係年輕貌美,“人見人愛,車見車載”。不過,美國航班就唔同,飛機師之強制退休年紀係65歲,但航空業對空中小姐、少爺冇退休年齡限制,就算閣下年近百歲,但仍然做得,唔想退休仍然可以繼續做。最近,某航空公司就有個叫貝蒂空中小姐被評為世界上年紀最大嘅空姐。或問“今年貴庚?”“奴家今年八十有一。”咪以為佢年齡大,唔做得,佢嘅工作能力,極少人投訴。呢位貝蒂21歲已入行,即係做咗60年。佢話自己本來到咗一定嘅年紀決定退休,但唔好彩個仔得咗一場重病,經濟問題不得不繼續自己嘅空中航程。從嗰陣時起,貝蒂就冇想過要退休,依家成為飛機上最老嘅空姐,喺國際航空上亦係最資深空姐。 

  講起空姐,周時飛嚟飛去嘅讀者心目中覺得邊隻航空公司嘅空姐最省鏡亮麗?八友首選係華航,佢哋空姐年輕貌美身材好,特別係穿上旗袍,更能吸引搭客眼球。可惜係20幾年前發生過幾次意外事件,打擊咗搭客嘅信心,聽講紐約航線年年蝕本,考慮取消直航。不過日前華航高層話現階段唔會喎。八友近幾年番香港,多坐國泰,但唔知係咪座位太窄,影響對空姐觀賞。綜合搭過國泰航空嘅人之意見,國泰空姐多係中庸之姿,小家碧玉型居多。八友坐過三次國航,佢哋嘅空姐素質唔差,高佻亮麗,加上座位較寬,航程舒適。不過,如果要轉機就咪搞。八友月前坐國航去香港,北京時間2點半到首都機場,要趕4點航班飛香港,過終轉站後又要過安檢?點趕,結果要改搭7點飛機。都OK。最弊係番紐約時,衹有1個鐘頭時間轉機,當然又係趕唔切。而下一班機係10個鐘頭之後,八友就咁喺機場遊來遊去,食用炸鳮午餐搵地方恰眼瞓。晚餐改喫貴價港式茶餐廳,見仲有大把時間,行經足浴店,走入去按摩,終於夜晚11點登機,瞓唔著都夾硬瞓,空姐點靚都冇眼睇。“??!八友喺機場嘅消費係咪可以問國航攞番呢喂?”

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版