您的位置: 首页/八友集/告西門慶 王寶強碌波減壓

告西門慶 王寶強碌波減壓

Nov 29, 2017, 00:59 AM

  有日同電影製作雷珍妮傾閒偈,問起王寶強喺紐約華埠拍嗰部“唐人街探案”拍成點,佢話紐約部份已經拍完,臺前幕後工作人員已返國做後期工作。佢又話王寶強好敬業,冇架子,但夜晚冇戲拍嘅時候就要佢陪去場館打保齡球減壓。八友心諗梗係啦!王寶強自己“引蛇入屋拉雞仔”,最痛心嘅莫如老婆馬蓉同經理人宋喆串謀,不但綠帽照頭笠,仲涉嫌偷取王寶強血汗錢,各種打擊,何止壓力打,如果唔堅強,自殺都有份。

  “婬人妻子笑呵呵。”宋喆呢個現代西門慶刑責難逃。日前閱報,北京朝陽警方已將涉嫌職務侵佔罪嘅宋喆刑事拘留。另外仲有三 人,都係王寶強公司工作人員,有一個仲係宋喆親戚。原來宋喆將自己幾個親戚安插入王寶強公司,王寶強同馬蓉決裂,宋喆亦離職,之後王寶強核查公司賬目,發現有一筆50萬人民幣嘅收入被宋喆轉到佢某個親戚嘅戶頭,因此發現宋喆涉嫌職務侵佔嘅線索而報案。更離譜嘅係宋喆不但同馬蓉苟合,喺一段時間內開房200幾次,對象涉及10幾個女性,其中包括無名女演員。友人大隻講直指宋某係婬賊,仲犀利過西門慶。又話王寶強喺少林寺學過武術,有武都頭嘅功夫,應該好好教訓呢個“我當佢喺兄弟,佢當我喺契弟”嘅宋某。八友話殺人償命,王寶強身家豐厚,唔想下半世喺監獄度過,都係啱嘅。“佢拍嘅電影多係智商低嘅角式,估唔到喺現實社會都低能。”

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版