您的位置: 首页/八友集/思家情切 外遊數周唔習慣

思家情切 外遊數周唔習慣

Nov 15, 2017, 01:19 AM

  旅遊返美已経一個幾禮拜,八友仍有時差問題,7點幾喫完晚飯之後就烏眉恰睡,眼皮不由自主耷落嚟,勉強捱到9點幾,忍唔住上床“搵周公”,但三四點又醒過嚟,喺床上綣來綣去,六點幾起身,梳洗完畢後,落公園晨運,好彩係開工時冇恰眼瞓。治療呢種時差唯一方法就係睇NBA,仲要係睇紐約比賽嗰隻先可以吸引眼球,相信睇多幾場尼克斯,就可以醫好時差。八友每次外遊番嚟都有咁情況,奇怪。嗰日遇見團友華哥,問佢有冇時差。佢話第一兩天大覺瞓,之後就正常番。“你係得嘅。”又日昨中午喺擺也街碰見另一團友,喺中華公所教英文嘅楊Sir,相約一齊喫牛尾飯。回想一過去三個禮拜行程,特別喺湖南,另有一番滋味。因為廣東人少喫辣,導遊識做,話已經吩咐廚師“走辣”。不過,有啲大師傅慣咗手勢,唔小心放咗紅椒、小椒,大家就要多多包涵。好彩喺湖南8日,廚師有記性,放辣嘅菜並不多。特別最後一日係自由行,一眾團友千辛萬苦搵到一間有港式燒臘嘅餐廳,坐低點菜時,發現有“深井燒鵝”、“蜜汁叉燒”、“出爐蛋撻”,他鄉遇故知,當場感動到喊咁滯。7個人喫完,將幾日嚟嘅飢餓感掃走,埋單600幾,抵。楊Sir說,喺美國住咗幾十年,習慣嗮,番到嚟先有回家嘅感覺。佢話外遊成個月,喺香港住喺元朗阿妹屋企,遍嘗美食,又唔駛做嘢,但住得幾個禮拜就想家,“八友,你係咪咁?”呢番話正合吾意。的確,喺外邊遊咗兩三個禮拜後,自不然想家,呢種感覺,相信好多人都有,係咪?

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版