您的位置: 首页/八友集/轉機噩夢 滯留機場十粒鐘

轉機噩夢 滯留機場十粒鐘

Nov 10, 2017, 01:46 AM

  “人生七十古來稀”。香港嘅珠海大學今年10月迎來70歲生日,美東珠海大學校友會組祝壽團返港。八友添為珠大一份子,見又有時間,乃跟隨會長李玉田兄等27個學長出發。19日晚抵達香港後,翌日前往屯門青山公路校址訪問,校方安排妥當,有研討會,同各地校友互動,隨後喺學校餐廳請食飯,唔止四菜一湯咁簡單,頗為豐盛,各人食指大動,幾手連汁都撈埋。最後安排參觀校舍設施,夜晚更有宴會,設喺九龍灣。隔日則前往廣東肇慶、廣州,主要係尋校根。珠大最早為廣東省廣州市嘅“私立珠海大學”,創立於1947年,原校址喺廣州市東山區竹絲崗二馬路,由陳濟棠將軍、陳濟棠兄長陳維周、中國文學家黃麟書、廣州市長李揚敬將軍、尹芳浦及教育家江茂森等廣東省籍人士所創辦。今次喺校方專員任姐帶領下來到舊址,面目並不全非,因為舊照片對照下,後面嘅百年舊樓還在。“係呢度啦!”可惜搵唔到“白頭宮女”,否則更加確認。

  今年“滑雞腎”美中不足之處除咗喺張家界團被臨時大加團費之外,就係轉飛機唔夠時間。八友坐過兩次國航,座位夠大舒適而且價錢唔貴,於是出發前一個月訂咗機票。當日由JFK到達北京時係下午3點,下班機去香港係個零鐘頭之後,心諗一定趕唔上,果不然,唯有改搭晚7點半航班,喺機場溜躂三個幾鐘。回程嘅時候仲慘,衹有一個鐘頭時間轉機。乃要求辦登機手續嘅職員安排坐前頭位,以便提早出閘跑過去。點知到達轉機閘口,但見人頭湧湧,打“蛇餅”等安檢。心中叫得一聲“苦也”。安檢完畢,衝到登機口,飛機猶在,職員卻遠去。打掃阿嬸見八友走到上氣唔接下氣,乃曰“遲咗15分鐘。”冇計,只好又到國航櫃枱辦手續。職員說“下班機係10個鐘頭之後。”“我知。”八友喺機場遊咗一輪,坐低聽音樂?眼瞓,喺美式快餐店喫炸雞,50大元,晚飯則喺港式餐廳食幹炒牛河、港式奶茶,110蚊有找。其間同曾在紐約做過報界,迴流北京嘅女記者微信聯系,“駛唔駛我到機場陪你呀!”“唔好囉!來回塞車6個鐘,唔好意思。”友之後又揾到足浴按摩,一直捱到深夜11點上機。完全係噩夢。“經驗教訓,以後要搭直航。”

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版