您的位置: 首页/八友集/濫收費用 99團變貴價遊

濫收費用 99團變貴價遊

Nov 9, 2017, 01:00 AM

  八友兩個禮拜前外遊散心,歸來後,多個團友都認為99蚊中國國內特價團有越來越搵笨之嫌。點解?因為表面係唔駛100蚊團費,但到時會收多好多倍。

  好似今趟八友同一班珠海大學校友番香港參加校慶七十週年,順便去張家界七日遊。團費係100蚊有找,但出發前旅遊公司交代有兩個景點同晚會必須參加,只係收多220元。團長李玉田問淸楚“就係咁多?冇所謂啦!”

  點知未到鳳凰古城,當地導遊竟然“打死狗講價”,話仲有三個非常有意思嘅歌劇、勝景係有需要去嘅。“幾多錢呀!老友。”“唔貴,400蚊啫。”跟住又加一句:“美金。”有一半團友抗議,話呢度使用人民幣,有乜理由又要俾美金,有得搶咩!但有幾個僑領、企業家如華哥、生哥等就話搶都要俾人,否則導遊呢幾日會“鑊撈”咁嘅面口,盞大家都唔開心,上咗賊船都冇辦法啦!結果小數服從多數,每人多出4張“龍蝦頭”。

  今次嘅團由99蚊變成七百幾蚊,你哋話係咪揾笨實?本來以為俾多咗團費,就唔駛去購物站,點知導遊照樣帶八友班“鴨仔”去絲棉店、茶葉店、玉器店、藥廠、枕頭床褥店。來自多倫多嘅老校友泰哥去完絲棉店後忍唔住發飈,大罵導遊浪費團友時間。導遊何仔話冇法,公司規定要去贊助商鋪頭起碼一粒鐘。

  八友全程只學楊老師買咗個叫負離子棉枕,因為想涉高個枕頭諗下有冇做過對人唔住嘅事。此外,喺藥店被足浴時覺得唔好意思,兩百蚊買咗樽藥油。其他團友可能都係“有米”之人,買完一樣又一樣。其中最佩服嘅係梅氏公所嘅華哥,佢購物唔多,屬於淡淡定定有錢剩之人。佢喺玉器店只買咗個“金鑲玉”,由於佢體態富福,被經理連同4個女職員挾咗入大房進行洗腦,推銷價值一萬美金嘅黑玉,最後見華哥不為所動,竟減價至八千人民幣。華哥教訓對方一輪,話唔應該一開始就抬到個價咁高,冇嗮誠信。又話自己係退休老人,用緊政府白卡,即係以前中國嘅貧下中農,正所謂刮莎都冇錢,點買得起一萬幾千嘅玉器呢!経理俾佢吹漲,要入廁所用凍水洗面。事後大家都贊華哥好嘢。“唔知係咪我個樣似有錢佬。係北京嗰次又係咁俾人挾入房間,不過都係賺唔到我嘅錢。”

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版