您的位置: 首页/八友集/想起核突 大酒店衛生好差

想起核突 大酒店衛生好差

Sept 13, 2017, 01:06 AM

  美東珠海大學校友會10月組團番香港慶祝母校70歲大壽,會長李玉田邀八友參加。八友都想行開下散下心,一口答應。至於住乜酒店問題。佢話香港校友同九龍嗰間乜都酒店有約,美東校友訂房,八五折優待。就咁話啦!喺網上訂咗8晩住房。呢幾年都係同八妻一齊去旅遊,八妻去後,今年衹能搵校友搭房。對於住酒店,八妻一定帶埋包括大毛巾等洗浴用品。八友則嫌麻煩,話酒店啲用品都好乾淨啫。但佢執意,仲同八友帶埋毛巾,話唔放心酒店用品。又話佢有個喺埠上做酒店執房嘅朋友,指酒店喺清潔衛生方面做得好求其。八友半信半疑,話咁多次去香港、大陸旅行,住嘅酒店都好企理啫。

  不過,睇完日前一篇報導後,八友開始對住酒店有咗戒心:有間獨立測評機構喺網上曝光北京五家五星級酒店,喺客人退房後右徹底更換床品、清潔浴缸同屎桶嘅情況。涉及之酒店有北京W酒店、北京三里屯洲際酒店、北京希爾頓酒店、北京JW萬豪酒店同北京香格裏拉飯店,都係赫捇有名。呢事件引起廣泛關注,但立即有人對調查機構質疑可靠性。央視記者近日采訪咗嗰間調查機構相關負責人,又攞到更多尚未喺網上公佈嘅視頻。喺視頻中,可以睇到北京三里屯洲際酒店同已經曝光嘅北京希爾頓酒店情況相同,床品、浴缸、屎桶圈、漱口杯四個項目喺客人退房後都冇更換清洗。北京JW萬豪酒店、北京香格裏拉飯店同北京W酒店三家酒店都係部分項目冇更換清洗。對於浴缸同屎桶,五間酒店全都冇清洗。嘩!咁都得,八友8年前參加旅行團住過北京洲際酒店,衹有留意金璧輝煌嘅裝飾,忽略咗其他用品,唔知當時係咪咁。依家住酒店,都有溫馨提示,就係為咗環保,希望客人唔好日日洗床被單。八友通常都答應,將“免洗”單張放喺床上。佢哋係咪一直冇洗呢喂!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版