您的位置: 首页/八友集/女權抬頭 點止撐起半邊天

女權抬頭 點止撐起半邊天

Sept 12, 2017, 01:31 AM

  風水輪流轉,新嘅一項研究表明,隨著女性喺社會上地位提高,依家做太太嘅往往賺錢多個老婆。

  以往“女子無才便是德”,身為丈夫嘅肩負起家庭重擔,負責賺錢養家,成為一家之主。如果丈夫乃和善之人,家庭自然和睦,否則會對老婆仔女呼呼喝喝,老婆衹有忍氣吞聲,哦都唔敢哦半句。

  不過,“女人撐起半邊天”呢句話激活唔少女性,好多未結婚已經成為專業人士,或成為企業主管。

  據Demography 雜誌發表調查研究,呢啲女性結婚後對家庭收入嘅貢獻大幅度增長,與此同時,老公對家庭收入貢獻則有所減少。

  八友睇完呢條消息,想起有個細侄10年前同個做內科嘅駐醫院醫生拍拖,佢自己則打政府工。

  女方家長嘅父母都係醫生,唔鐘意細侄追佢個女,可能覺得佢唔配,應該係“木門對木門”先至啱,因此對細侄甚為冷淡。其後細侄喺NYU讀完碩士,又係NYU醫院搵到份行政工作。最後同醫生女友結婚,生兒育女,組織咗幸福家庭。

  由於細侄一表人材,溫文和善,佢岳父母由“唔鐘意”慢慢改變為接受,特別對一對粉雕玉琢嘅外孫甚為愛惜。

  據知,佢嘅太太進修成為專科醫生後,薪水高出佢一倍。有時見到細侄,多口笑問佢老婆有冇俾面色佢睇?細侄話拍拖時已經明白自己搵錢唔夠女友多,曾經思想鬥爭咗一輪。但知道女友係腳踏實地,唔係追求名利之人,因此冇放棄追求。

  結婚後雖然間中有抝撬,但絕對唔會用“我搵錢多過你”呢句話嚟壓佢。八友恭喜佢,因為大多數男人自尊心強也。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版