您的位置: 首页/八友集/ 傾家蕩產 五分局鐵腕治賭

傾家蕩產 五分局鐵腕治賭

Sept 8, 2017, 01:37 AM

  熱天休息咗兩次嘅華埠警民每月例會,9月第一個禮拜三復會。五分局轄區範圍照舊冇重大事故,衹有一啲偷偷摸摸小案。

  不過,局長吳銘恆提到唐人街賭館林立,呢個月頭仲發生一宗打劫賭檔引發嘅打鬥案件。警方今後會加強取締,遏制賭風。

  友人大隻講話吳銘恆係賭博尅星,最令人叫好當然係掃蕩哥倫布公園嘅賭檔。

  呢個公園之賭檔始於1996年,當時五分局雖耐唔耐走去清場,但唔見積極,因此賭檔一直未停過,直到依家呢個唐人局長,用鐵腕手段治理,賭檔即刻收皮。將來吳銘恆高昇,賭檔會否魔鬼歸來,就要睇繼任者嘅魄力矣!

  老實講,唐人街嘅賭檔已非今日之始,應該追溯至130多年前,即係有唐人街就有賭館。

  八友1973年移民到紐約,就有鄉親帶落去“土庫底”(非法賭館90%開喺地庫”見識,同喺“吉祥賭坊”等電影嘅場景差唔多。

  賭局分別有牌九、十三張、七張同番攤,入夜之後,人聲鼎沸,煙霧彌漫:“四單洞”、“匯豐銀行”、“通殺”。其中牌九檔最吸引人(大西洋賭城知道華人最喜歡賭牌九,千方百計引進。),往往圍上兩三重人,隨時一萬幾千銀上落,有啲餐館老闆帶住一箱銀紙去賭,最後一個空箱拎走。

  “大江東去錢淘盡,千古爛賭人物”,唔少人辛辛苦苦打工賺到嘅錢,就咁喺賭枱上流走。賭場咁多錢,自然引起幇派垂涎,因此,華青打劫賭館,時有發生。賭場雖有兩三重關卡,但防不勝防,唔小心被賺門而入,又唔能夠報警,損失慘重。

  或問八友輸得多唔多。托賴嘅係,八友流連賭檔嘅時間極少,因為那年春節,袋住約一千銀落土庫底搏殺,結果晤駛半個鐘頭輸光,痛定思痛,番到屋企,上香發誓,以後唔賭土庫底,咁先至可以存到交租開飯錢也。

  總之一句,賭錢,死硬。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版