您的位置: 首页/八友集/危害嬰兒 粗心父母要嚴懲

危害嬰兒 粗心父母要嚴懲

Aug 11, 2017, 01:53 AM

  好多時候睇報紙會發現一啲粗心大意嘅父母湊BB極唔小心,輕者整傷小朋友,重者令到小朋友窒息而亡。呢啲大意爹媽,竟然包括醫生在內:香港何文田一個醫生父親日前摣車帶兩子外出喫早餐,因為冇兒童安全椅,竟然將患感冒年僅兩個月幼子用斜孭帶孭在胸前,再扣上安全帶開車,三仔爺番屋企途中,細仔突然喊到收唔到聲,冇耐昏迷命危,警方調查係咪同安全帶有關。因為用孭帶孭兩月大兒子開車,男嬰可能俾安全帶緊勒而命危。有汽車專家形容做法非常危險,因安全帶除咗可能勒傷幼兒外,更會喺駕駛期間突然煞車或發生車禍,亦會令幼兒夾傷或受創。

  睇完呢段新聞,八友無言,將個仔孭喺前面開車,危險過乜,冇知識嘅人都會知道不可為。但身為醫生竟然作出錯誤示範,真係唔知佢嘅醫生牌點樣考番嚟。最安全做法當然係用“嬰兒安全籃”扣喺後座。呢個醫生老豆居然唔預備安全籃,想慳得就慳,抑係冇餘錢添置?八友亦係最近先知“嬰兒安全籃”嘅妙用,因為上個周未同兒媳、兩個三四歲孫兒孫女開車到新州普林斯頓,就係用安全籃俾兩個小朋友安坐。八仔話咁樣做最安全。結果真係,小朋友喺籃內唱歌、瞓覺,司機安全開車,平平安安。又大家有冇留意,美國嘅父母忽略嬰兒安全有增加趨勢,特別喺大熱天時,將小朋友獨留車上,自己走去購物或歡樂,忘記咗子女喺車內,結果導至小朋友熱死、焗死。呢啲粗心父母,一定要嚴懲。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版