您的位置: 首页/八友集/避暑紐約 大陸港台熱到爆

避暑紐約 大陸港台熱到爆

Aug 9, 2017, 01:46 AM

  日前喺包厘街遇到一個多年前迴流香港做生意嘅朋友阿輝,佢話呢幾年都會喺6月至8月番紐約“避暑”,因為香港熱到令人頂唔順,特別系佢呢種上咗年紀嘅人,太冷或太熱,對健康都唔好,所以喺暑熱天走番美國,等涼番小小先番去。又話佢住喺大埔,新界地方,空氣好啲,比轉住喺油尖旺或灣仔銅鑼灣,仲辛苦,有氣冇處透。八友笑佢不如去邁阿密,嗰度空氣仲好。佢話都可以,親細佬住喺邊,弊在太隔攝,都係紐約朋友多。又叫八友番香港時搵佢,住大埔好過住旺角,出市區一樣方便,勝在交通工具多。

  八友最怕熱,十幾年前9月底去台灣旅遊,有次喺街上熱到幾乎暈低。今年仲聽講寶島持續高溫,電力不足,政府要出限電令,並且以身作則,辦公機關唔准開冷氣,你話唔焗到嘔白泡就有鬼。香港離台灣唔遠,自然都係熱到冇影,老友輝要番美國避暑,可以理解。即係八友咁,每次去香港,一定要過10月,“天涼好個秋”。舊年則10月中飛大陸港台,去廈門、金門三日遊,嘩!氣溫高達90度,亦熱到暈低咁滯。美國有啲地方雖然亦好Q熱,但熱得來比較涼爽,唔至於令人太難受。記得有個奧蘭多教功夫嘅朋友,佢話每次到紐約,都會感到呼吸困難。雖然講得誇張,但大都會人多,廢氣多,空氣當然冇咁好。依家全世界都面臨不良氣候變化威脅,有識之士苦思解救良策,唯有獨夫特朗普揮刀,退出巴黎氣候協定。唯有無言。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版