您的位置: 首页/八友集/ 天女散花 影響飛安真愚婦

天女散花 影響飛安真愚婦

July 6, 2017, 01:44 AM

  俗語說“行船跑馬三分險”,但乘搭交通工具,點險都唔夠坐飛機險。所以,如果飛機發現有老鼠,一定唔飛得,要捉到為止,否則俾鼠輩咬爛電線,威脅乘客安全。機場附近飛鳥多,都要想辦法清除,避免雀鳥同飛機競賽,撞到有難。但最怕就係人為嘅破壞,其中莫過於打手機。

  起飛前,機長已經千叮萬囑:就快起飛啦!請關閣下手機。偏偏就有人摣住手機,雞啄唔斷,同二奶或同姦夫情話綿綿。大佬,你死就好啦!唔好連累成村人。

  仲有冇乜破壞飛安行為?

  有,最近有一件講你都未必信嘅騎呢行為:喺一個禮拜前,中國南方航空公司一架浦東-廣州嘅客機,一名80幾歲嘅阿婆同屋企人喺登機過程中,行到客梯車中部竟然向發動機扔擲硬幣,喺客梯下面檢票、艙門口迎賓嘅工作人員都睇唔到。好彩老太丟硬幣嘅舉動俾身後嘅搭客睇到並報告。 

  隨後,近150名旅客下機等候,滯留機場。機場公安到場介入調查。

  經上海市公安局國際機場分局調查,涉事旅客邱姓老太太自稱咁做法喺為咗祈求飛行平安。

  “嘩!咁都得,老人家做破壞王,佢冇理由唔知咁樣做,好危險嘅咩!”友人大隻講說。

  講真,阿婆對自己嘅騎呢行為會威脅飛行安全,懵然不知,絕不出奇。佢可能經常去廟宇道觀,去親就將銅板掉落許願池,祈求自己一家平安,中彩券中到手軟。以為搭飛機亦可以咁做,於是“天女散花”,殊不知危險過乜,幸好有人手急眼快睇到,否則大鑊。

  “唓!幾個銅板之嘛!駛唔駛咁緊張。”君不見日前大陸有個許願池一隻老龜唔小心呑咗幾個銅板後哽死咩!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版