您的位置: 首页/八友集/握手神功 特朗普遇到勁敵

握手神功 特朗普遇到勁敵

May 31, 2017, 01:11 AM

  唔少政府官員同媒體指70歲嘅特朗普好似7歲嘅小朋友。讀者認為如何?八友亦有同感,並且覺得呢位總統與金庸小說中之“老頑童”周伯通有的相似,頗有喜感。特別係佢同各國政要握手嘅時候。例如日前舉行嘅北約峰會前後,特朗普同法國新總統馬克龍第一次見面,上演咗著名嘅“世紀之握”。雙方會談前,坐喺座椅上開始握手。兩人四目相對,嘴唇緊閉,都非常用力,身子前傾,指關節變白,禮節性微笑變得僵硬。握手持續好幾秒,最後特朗普似乎流露出“停戰”意思,先鬆開緊握嘅手。法新社說,喺特朗普強大握力下,馬克龍“毫不動搖”。特朗普兩次想將手抽番出嚟,第二次才先至成功。馬克龍事後接受採訪時話“我同佢握手,並唔係冇含義嘅。我必須俾大家見到,我唔會讓步,就算係象徵性嘅事。”

  經馬克龍提點,讀者可以明白到,握手喺政治上有咁大學問。以往多任美國總統同政要握手,都好自然,好得體。衹有“老頑童”總統別具一格。佢第一次令人關注嘅握手,乃係日本首相安倍月前訪問美國時同特朗普喺白宮見面,特朗普有意示威,握住安倍隻手,任憑日相點抽都抽唔出,鬼死咁尷尬,而特朗臉有得戚之色,心想“你嘅相撲點夠我嘅摔跤鬥呀!架頭。”經此一役,特朗普任何政要場合都賣弄其“握手功”,唔知係咪啲人怕咗美國抑或尊重耆老,都讓佢一步。但試得多,外國政要心想長此落去唔係辦法,聽講,佢哋針對特朗普之握手神功,勤練反制之法。馬克龍初試啼聲,果然奏效。特朗普咁樣握手,係咪好冇禮貌?傳說,1954年日內瓦會議,時任中國國家總理周恩來率團參加,美國代表團嘅時任國務卿杜勒斯拒絕同周先生握手。是耶!非耶!有不同說法。友人大隻講說:“其實握手唔係咁好,特別係對有潔癖嘅人來講。最好係我哋古代嘅拱手為禮,方便又唔怕傳播細菌。”

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版