您的位置: 首页/八友集/ 隔山打牛 假大師忽悠太極

隔山打牛 假大師忽悠太極

May 15, 2017, 01:59 AM

  終極格鬥徐曉冬打低雷公太極宗師魏雷事件引起好多人對太極拳打唔打得嘅疑問。

  八友呢排周時上網揾有關視頻來欣賞。終於搵到有一位“大師”閆芳,嘩!犀Q利,幾個大漢圍住佢,壓迫佢,但見佢好似發冷震咁震几震,班大漢就好似倒蘿冬瓜咁滾倒冇雷公咁遠。之後呢位大媽一人推到幾人。視頻連嘲帶諷稱為“最強太極推手”,能隔空打人。

  呢啲“太極神功”喺最近徐魏比武信任危機中被網友扒出來,質疑太極拳“忽悠”。

  太極“四大金剛”朱天才大鬧:“呢啲人其實係假嘅。冇假嘅太極,只有假嘅大師、假嘅做法。”另一太極高手陳照森亦講,隔山打牛都係炒作,邊個有呢個能力。打前面一個,後面几個痛,可能咩!

  其實,呢種隔山打人太極,八友喺紐約同波士頓都見人表演過,几乎想叩頭拜師。

  講起太極,嗰日同兼學白眉派同吳式太極嘅周文師傅飲茶。佢話啱啱喺羅斯福公園操完“直步”再打“九步推”,有兩個五分局警察走入場問佢打乜功夫。佢答“少林拳”。“我哋喺少林寺學過功夫,都未見過咁嘅拳嘅。”“你哋喺北少林學,叫做武術。我呢啲係南少林拳,叫做功夫,梗係唔同啦!”文哥話差佬說得閒跟佢學,佢聽住先。

  上個禮拜本報記者訪問虎爪派掌門伍偉康,憶述40年前佢徒弟保羅偉梭同台灣七巧拳宗師李民欽比武一事。八友當年亦為座上客,記得全院滿座,黃牛票炒到百幾兩百蚊一張。比武前先由甄子丹嘅媽咪麥寶嬋、華林螳螂陳培、龍形拳洪慶潮等師傅表演助慶。

  正式比賽時,但見李民欽雙手垂下,保羅偉梭雙拳護胸,雙方遊走約10秒後埋牙,接觸6秒後,李民欽被一腳踢中頭部,倒地昏迷不起,急救後先醒番。大會宣布鬼仔勝。李宗師將點打都得嘅生死狀忘記反口指鬼仔踢佢頭犯規,要再打過。

  保羅偉梭用咪向大眾表示“今次喺打擂台,唔係做騷。”而賭李宗師嬴嘅同觀眾更加鼓噪,話唔打唔走。

  為免場面失控,大會乃俾兩人再打第二回會。結果李宗師仲慘過雷公掌門,周身瘀傷,要揾溫志明師傅敷跌打藥。冇耐離開美國。而鬼仔則全力喺輕量級拳擊界發展,連攞十屆冠軍。“大英雄”得徒如此,老懷安慰。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版