您的位置: 首页/八友集/搭機求償 正理歪理有得煩

搭機求償 正理歪理有得煩

May 11, 2017, 01:58 AM

  自從陶大衛被聯合航空夾硬拖落飛機事件爆發,提控前庭外和解之後,航空公司同乘客之間嘅衝突事故就時有發生。日前,一名喺澳洲搭乘美國航空去洛杉磯嘅旅客聲稱,佢俾鄰座兩個大肥佬壓迫到幾乎抖唔到氣,一路煎熬14個鐘頭。佢向空服小姐要求換位,但對方好似有虐待狂咁拒絕佢一再提出換位要求,害到佢被迫用蹲,跪,緊抱雙臂,站立,來舒解被大肥佬“壓縮”喺佢嘅飛機座位上嘅痛苦。佢話佢座位不過43公分寬,而兩個大肥佬軀體因為無法全部“塞”入自己座位,而跨越座位界線“侵入”佢嘅座位。呢段14小時苦刑,導致佢永久性背傷同頸傷。求償人說,佢唔怪嗰兩个肥佬,因為佢哋都買咗機票,佢怪航空公司。 佢要求美航為佢嘅傷害賠償10萬美金。

  求償者會唔會告贏?不得而知,估計唔容易。或者美航象徴式賠1蚊兼送番一客飛機餐未定。因為此例一開,好多搭客會以各種理由想搵航空著數,例如隔離搭客猥瑣、有臭狐等,豈不是賠極都唔掂?不過,八友好同情嗰位求償者。大家試想下,依家嘅飛機経濟座位窄到令人揸頸就命,喐不得其正,偏偏有兩個大肥佬兩邊夾住,肥軀“偷戀隔牆花”,真係會令到中間嗰位窒息?!八友覺得美航嘅服務唔夠囉!及唔上八友舊年從香港飛紐約嗰間航空公司嘅服務。嗰次航班滿瀉,八友同八妻唔同坐,地勤話上機後叫空姐安排調位。上機後,空姐答應安排。八友隔離位係個華婦湊住兩個分別係三、四歲小朋友,扭計爆喊,根本係精神虐待。冇耐,空姐真係為八友換到坐喺八妻身旁,而原先座位則係一個華人靚女。唔知佢有冇投訴或要求賠償呢!

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版