您的位置: 首页/八友集/ 唔駛制水 東江之水越山來

唔駛制水 東江之水越山來

Apr 19, 2017, 01:03 AM

  香港立法會發展事務委員會考察團日前前往廣東考察東江水,本來就唔係乜消息。但出現“長毛”梁國雄就係新聞。八友喺電視新聞畫面所見,獲發一次性通行證,隨團出發嘅社民連立法會議員梁國雄,身穿西裝外套扣上黃絲帶隨行。不過,長毛因為帶有四五行動卡片,被海關檢查,最後都順利過關。長毛年前曾經帶“違禁品”闖關,但被海關攔截,踢佢走人。今次唔敢六四乜、六四物,可見條友識時務。立法會發展事務委員會考察團已完成一連兩日東江水考察行程。今次行程發現東江流域水質普遍良好,議員對水質亦表示非常滿意。團長話,由於香港冇豐富地下水源,亦冇穩定降雨量,因此東江水係本港重要嘅淡水資源。

  點解會有東江水供應香港?香港年青一代大多矇查查,衹有上咗年紀嘅如八友先知。話說1962年底香港各水塘已經見底,故政府決定由1963年1月起實施一日供水4小時。點知天仍不降甘霖,政府再宣佈6月1日起改為4日供水1次,每次供水4粒鐘。由於每區街喉數目唔多,一家人拎住水桶喺街上輪流排隊取水成為一般市民生活重要環節,而排隊期間所造成嘅混亂,連帶市民間爭執不時發生,亦影響鄰里間嘅關係。八友屋企為咗儲水,揾裝修佬喺廚房搭建咗個水池,到時到候就開大水喉蓄水。當水勢衹有點滴時,就大嗌樓下“喂!俾啲水用下得架,唔該樓下閂水喉。”如此一層叫一層,有如獅吼功。呢種困境,直至1965年夏天嚟咗個大風姐落大雨先結朿。港府痛定思痛,怕“何日君再來”,於是決定向大陸買水,進行大工程,將東江水引進香港。大陸仲拍咗一部紀錄片“東江之水越山來”。從此,香港亦解決食水問題。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版