您的位置: 首页/八友集/ 隔山買牛 男不對辦女退貨

隔山買牛 男不對辦女退貨

Mar 16, 2017, 01:07 AM

  有個女人日前到美東聯成公所求助,原來係婚姻問題。佢話有個朋友嘅朋友係一個體重兩百幾磅嘅30幾歲女人,一直搵唔到結婚對象,明白如果繼續喺美國搵老公嘅話,希望較為渺茫。得和佢喺大陸交遊廣闊,不如搵佢介紹啦!佢樂得做媒人,一口答應,終於搭通天地線,大陸親友俾咗兩個男人嘅資料佢,佢交俾女方,最後欽點某君,要某君自己辦簽證過嚟。某君好不容易先至辦到旅遊簽嚟到紐約。那知女方一見之下,發覺男方既無潘安之貎,亦無宋玉之才,竟然高叫“退貨”,不顧而去。

  求助者向聯成顧問趙生表示,呢個男人依家兩頭唔到岸,希望聯成公所幇下。趙生兩手一攤:“點幫,冇得幫。就算有得幇都唔會幫呢種買賣婚姻。女方擺明係想搵個啱自己嘅男人結婚,可能發覺“咁都得!”,唔滿意。男方係想移民美國,有咁嘅機會,自然唔放過。可能自身條件真係唔掂,姻緣告吹。依家衹能回國。你如果幫到佢,就你幇。”

  求助者無奈離開之後,趙生說呢種案件真係冇得做。又話兩方都心存僥倖,結果事與願違。八友話過埠新娘聽得多,過埠新郎則少聞。呢種婚姻亦有成功例子,但以失敗居多。

  八友有個細侄,樣子普通兼內向,35歲都搵唔到對象,後來有親戚介紹佢番大陸相睇結婚。冇耐,老婆申請赴美批准,佢去機場接機,那知老婆俾第二個男人接走。擺明騙婚。呢類故事,多不勝數,奈何。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版