您的位置: 首页/八友集/ 受戒整頓 雲南旅遊要學好

受戒整頓 雲南旅遊要學好

Mar 15, 2017, 01:38 AM

  友人球哥想同老婆去雲南旅遊,但佢話最近睇新聞,發覺有好多負面嘅嘢,特別係有個女游客因催賬單引發衝突被店主毆打到面腫毀容嘅消息,嚇到佢立即縮沙。又難怪球哥有此顧慮。的確,雲南美景靚爆鏡,可能因此恃寵生嬌,旅遊品質每況愈下。閣下唔買嘢,好可能俾導遊鬧到體無完膚,出唔到門口。“唔會?!我哋雲南咁差?”春節前, 雲南副省長唔信有咁嘅事,學包青天明查暗訪,到民間參加旅遊團,果然遭遇“落閘放狗”,“強制購物”。佢番到辦公室後,嬲到青筋現出,話要嚴辦。今次知衰啦!麗江市古城區政府表示誠懇國家旅遊局嘅處理決定,接受輿論監督,接受廣大游客對佢哋嘅批評同意見。佢哋要整改麗江古城景區存在嘅問題。對麗江等7個重點地區的重點問題進行重點督查云云。

  雲南,八友去過兩次,第一次去乃係15年前跟衣聯會班前輩出發,由中旅社安排。當時雲南開始推廣其旅遊項目,所以好乾淨企裏。舊年,八友與妻則跟珠海大學美東校友會參加特價團(即係99蚊團費,但加埋其他雜項、小費等等要四百幾先至搞得掂嗰隻)。8天7夜,如果唔“強制購物”,應該係好玩。老實講,呢種特價團,八友參加過兩次,導遊當然帶大家去購物,但極少開聲逼人買嘢,最多有時唔高興咁話:“大家購物啦!幇助本地經濟。”但5個月前去雲南,嗰位導遊小夥子見大家睇嘅多,買嘅少,就非常唔鍾意,有次帶去買絲棉用品時,直頭要大家買夠一個數目,等佢可以交差。訓咗一輪話之後,大家心裏有數,就係“好啦!費事你再嘈,話我哋班金山阿伯孤寒。”結果幾個人買咗約兩萬五人仔絲棉。八友則唔買,因為八妻鍾意冚鴨毛被。雲南名勝無數,真係值得一遊。依家由旅遊局大力整頓,相信有一段長時間安定也。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版