您的位置: 首页/八友集/年關要過 華埠春節熱鬧多

年關要過 華埠春節熱鬧多

Jan 27, 2017, 01:20 AM

  齊天大聖將喺2月28日凌晨怪叫一聲“老孫去也”,接位嘅會係雄糾糾,氣昂昂嘅金雞。

  猴去雞來,眨下眼,又係新嘅一年,對上咗年紀嘅人嚟講,時間過得特別快,一到春節,就會感嘆時間飛逝。有貪窮人家喺年卅貼出春聯:“年關難過,年年要過。借錢要還,有銭才還”。可見無隔宿之糧嘅家庭,過年對佢哋嚟講,頗為頭痕。細個讀書嗰陣,每到過完聖誕節,都會伸長條頸,數下手指,問“仲有幾多日係農曆新年?”因為有新衫著,有利是,有得食有得玩,係相當過癮嘅事。

  不過,1970年春節八友卻過得相當孤寂,因為老母親69年番大陸省親時被誣指有資本主義思想,要改造學習,暫時唔番得香港。八友唯有獨自一人食飯、行花市,期望阿媽早啲獲釋。

  1973年1月17日移民美國,先知乜叫寒冷。當時距離春節不到1個月,年卅晚,大鵬同鄉會喫團年飯,老爸帶住去黐餐,食完之後喺會所睇溫志明師傅帶住班徒弟表演舞獅、打功夫,年初一嗰日俾朋友拉住喺溫師傅舞獅隊中做咖喱啡擔旗。香港自1967年暴動後唔准燒爆仗。6年之後喺紐約重睹“炮竹萬聲除舊歲”嘅盛況,華埠嘅勿街、擺也街、宰也街好似舖咗厚厚嘅紅地氈,始知紐約唐人街過年咁熱鬧。八友呢個新鄉里,跟住老豆周圍拜年收利是,小財滾滾,收入頗豐。年過完之後,就開始捱世界了。

  喺呢四十幾年中,八友每個春節都喺唐人街過,見盡滄桑變幻,1996年,市長朱利安尼禁炮竹煙花令出如山,華埠再無硝煙,春節雖然失去熱鬧,但人們安全安心,由最初嘅怨憤變成現在之贊譽。

  17年前,華埠花車遊行出現,其熱烈情況更勝從前,相信今年天氣不會太差,春節氣氛更濃,大家在雞年行大運,身 體健康,萬事如意。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版