您的位置: 首页/八友集/物離鄉賤 撲殺鯉魚奬百萬

物離鄉賤 撲殺鯉魚奬百萬

Jan 25, 2017, 00:54 AM

  有冇人想要100萬元奬金。原來,密西根州受亞洲鯉魚泛濫之患,日前懸賞100萬元高額獎金,希望有人有辦法解決大湖區亞洲鯉魚氾濫問題。獎金可以獎勵俾一個人,亦可以由幾位創新者共有。

  點解密州對鯉魚恨之入骨,欲除之而後快?密西根州自然資源部“鯉魚入侵挑戰”網頁指出,鯉魚進入密西根湖同其他大湖區流域將對漁業約70億元產值構成威脅,對水上娛樂活動同旅遊活動嘅影響更高達380億。有專家建議,可以俾錢人捉鯉魚。而伊利諾州同印第安納州一直倡導向釣魚者提供獎勵,捕撈大頭鯉、銀鯉同黑鯉每條有10蚊獎金。不過,咁嘅奨勵辦法好重皮,仲貴過100萬蚊,況且唔可以斬草除根,可能係咁而不被接納。

  俗話說“物離鄉賤”,鯉魚雖然唔係好名貴嘅魚食,但亦好受歡迎。相信好多人都聽過“臥冰求鯉”嘅故事,晉朝嘅王祥冬天為繼母瞓喺冰上捕鯉魚,被列入《二十四孝》中,鯉魚亦因此成名。

  估唔到2000年後移民美國,綠卡尚未到手,就俾美國佬追殺,真係喊得一句句也。鯉魚大哥,係番鬼佬唔識嘢啫,無謂傷神。

  老實講,中國人“求鯉若渴”,美國湖水咁靚,鯉魚肯定鮮美,何不發動捕魚人士捕捉,運到大陸港台銷售,肯定賺到盤滿砵滿,係財路一條也。同時,亦可捕之運到全美各地唐人街,游水鯉魚,十二三蚊一磅都大把唐人會買,“薑蔥屈鯉”、“雞油鯉魚”,名菜也。由舞獅隊採個“鯉躍龍門青”,更加好意頭。一家便宜兩家著,密西根州自然資源部不妨諗下。呢100萬,八友賺梗。

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版