您的位置: 首页/八友集/只避四四 蔡英文八卦難猜

只避四四 蔡英文八卦難猜

Jan 17, 2017, 00:04 AM

  有人鬧八友點解咁八卦。其實,如果同台灣地區領導人蔡英文相比,差遠矣!點解?蔡小姐出訪中南美洲最後一站過境美國舊金山時舉行僑宴,超過800個僑胞參加。當然,抗議佢:“台獨”嘅華僑華人亦唔少。喺凱悅飯店舉行僑宴筵開80席,蔡英文講嚟講去都係三篤屁,冇乜新意思,但俾心水清嘅媒體發現,唔知係咪想避開唔吉利諧音,除咗長型嘅主桌以外,從1到83席編號都連號,唯獨冇咗“44”席。44嘅諧音就係“死就死”。

  照新聞八卦嚟睇,只係避開“44”,咁樣即係照樣有4、14、24呢三席。按字音,呢三個4仲更加唔吉利,反而“44”更有氣場。“死就死啦!一於去馬。”你哋話係咪。據知,唔少人喺度估,究竟避開44席係蔡英文嘅意思,抑係擦佢鞋嘅芝蔴綠豆官員意思?“蔡小姐係讀番書長大嘅,睇怕佢唔會迷信呢啲嘢?!”友人大隻講說。“又唔咁講囉!蔡英文競選嗰陣時落鄉,周時求神問卜,成個八卦婆咁,你話佢唔迷信,絕對非也。問題係點解只係避開《死就死》,而《死》、《實死》、《易實死》就由得佢存在,真係諗極都唔明。”大隻講話讀番書唔迷信,八友不敢苟同。1985年嘅五分局洋局長傅來原本14日離任,突然同助理雷柏銳講,佢要留多一日。問點解?因為唐人14諧音係實死,我唔想。結果2000年五分局輔警聯歡會上見到佢,人雖然蒼老咗啲,但仍精神奕奕,可能係避開14日退任之故。當然,亦有好多人唔迷信,20幾年前,八友有個年紀大嘅同事,佢Call機嘅號碼最後四個字竟然係4444,八友奇怪,佢笑說:“係我自己揀嘅。”

本文版权属“纽约侨报”所有,转载请注明“来源:纽约侨报网”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 版权声明| 联系我们| 意见建议| 网站地图| WAP版