您的位置: 首页/八友集/沙圈賣淫成絕唱 賭王知否

沙圈賣淫成絕唱 賭王知否

Mar 21, 2016, 01:22 AM

  最近,皇后區大舉掃黃,將好幾間所謂只係做按摩唔做其他嘢嘅按摩院釘上封條,良家婦女大快人心,大叫麻甩之佬冇癮。無獨有偶。日前睇到新聞,話舊年拘捕嘅澳門賭王何鴻燊之親戚何猷倫被控操縱賣婬案宣判,為首嘅六名被告罪名成立。法官判刑指首被告何猷倫作為葡京酒店最高決策人,證據顯示佢容許、引誘女子喺沙圈賣婬,判刑1年1個月;因羈押期已超過刑期,即日釋放。法官喺宣判時指出,該賣婬活動早在1995年已經喺葡京酒店出現,具有一定嘅規律性同紀律性,且整個社會都明顯知道存在超過20年,首被告何猷倫冇理由唔知。

  俗話說“嫖賭不分家”,有賭嘅地方必定有嫖,聽好多大西洋賭城常客講,賭場有馬伕搵食,問賭客要唔要按摩仲有下文。八友有年旅遊馬來西亞,雲頂賭場係旅遊重點之一,八友嫌賭廳烏煙瘴氣,冇賭,但試過兩次被馬伕喺身邊問:“要唔要小姐?”講返澳門葡京賭場,未移民之前去過,唔覺有扯皮條,更冇所謂沙圈。何謂沙圈?起初亦蒙查查。2007年,八友跟隨華協足球隊前往澳門參加“回歸杯”足球比賽,足總請完球隊喫飯後,領隊樹鴻兄帶大家去葡京觀光“沙圈”,原來係一眾美嬌娥喺一個圓型商場外搔首弄姿,煙視媚行踱步。樹鴻兄說,如睇啱邊個,可直接議價,然後上房。又加一句:“咁樣踱步,有如跑馬地練馬師喺沙圈拉馬慢操,所以叫沙圈。現在澳門沙圈已成絕唱。但好多人想:何賭王知否有沙圈呢碼事?”

本文版权属“纽约侨报”所有,转载请注明“来源:纽约侨报”。违反上述声明者,我们将追究其相关法律责任。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版