您的位置: 首页/八友集/機場老鼠太猖獗 貴物跟身

機場老鼠太猖獗 貴物跟身

May 18, 2015, 01:45 AM

  早排紐約機場有“機場老鼠”專偷搭客行李,其後當局明查暗訪,終於逮捕數名涉嫌人,原來係有內鬼幫手,俗語話“冇鬼唔死得人”,如果冇機場工作人員幫忙,“機場老鼠”都唔會咁猖狂也。據講,飛機旅客失竊行李嘅情況日益嚴重,但係有啲物品甚至連隨身行李都唔應放,只可貼身收藏,更何況係托運行李。將貴重物品放入託運行李,可能遺失、被偷或者受損壞,而且極有可能無法獲得賠償。資料顯示,從2010年到2014年,向聯邦運輸安全局(FAA)投訴嘅行李丟失案件,就多達3萬宗以上,大多數係托運行李。紐約肯乃迪國際機場最嚴重,跟住係洛杉磯機場、奧蘭多機場同邁阿密機場。

  大家仲要記住,除咗貴重物品如金銀首飾、珠寶藝術品等唔能夠託運之外,藥物亦唔好。八友就試過一次,幾乎撞板。有次番香港,中途迷迷糊糊瞓著,醒後但覺全身骨痛,喉嚨火燒,弊!大感冒,想喺手提行李揾藥物,突然醒起放咗喺託運李中,冇法,唯有發冷發熱飛到香港,立即揾藥救命。經此一役,每次遠行,藥物隨身帶。喺香港嚟朋友唔知有冇試過,以前參加亞洲如韓國、泰國旅行團,導游都會交件物品叫你幫手帶過關,係乜嘢,佢冇講,只係話唔係違禁品。原來係啲電器產品,過關後喺當地出貨,會賺一兩倍,導游靠此賺多少。八友試過帶兩次,都係有多少驚驚哋,唔知呢幾年仲有冇“幫帶手信”呢!其實,“機場老鼠”全世界嘅機場都有,就睇下閣下好唔好彩,或者笨到將金銀珠寶塞入託運行李,引人犯罪。

评论

关于侨报| 报纸广告| 数字广告| 免责声明| 联系我们| 意见建议| 网站地图| WAP版