/ad/U302P5058T12D1F90DT20150515124649.jpg|http://video.ny.uschinapress.com/ad/ad.html|3


警民衝突何時了 美國頭痛


  禮拜一嗰日夜晚睇NBA紐約尼克斯對休士頓火箭,睇咗半場,正在上網嘅八女突然說:“弊!密蘇裏白人警察槍殺黑人青年布朗案件今日審結,陪審員一致裁定警察冇罪,依家開始有人上街示威。老豆,轉臺睇下新聞啦!紐約都輸梗,睇唔睇都罷啦!”八友諗下又啱,尼克斯開季以來,爛到唔恨,粉絲如八友等已經冇眼睇,於是轉臺睇密蘇裏事件新聞,但見當時街上氣氛沈鬱,有“山雨欲來風滿樓”的氣勢,隨著時間推進,示威嘅人越來越多,有超巿、店鋪開始被人沖入打、砸、搶。採訪嘅記者大多係黑人,但都俾抗議嘅人警告唔好採訪影相,後尾仲向記者掟物件。八女問以前有冇類似抗議歧視事件發生?告知1992年洛杉磯發生多個白警毆打黑人男子事件,搞出好大件事。八女上網一查,知道當年暴動死咗56人,傷逾百人,經濟損失難以估計。“希望今次事件儘快解決啦!否則好慘。”八女說。

  說話間,密州警察開始放催淚彈。八妻話點解美國警察動不動就放催涙彈,美國唔係一直鬧香港警察放催淚彈嘅咩?點解依家搬起石頭打自己隻腳?講一套做一套喎。接住,電視畫面播放成千人喺時報廣場遊行控訴密蘇裏判案。八妻有啲心驚:“阿女,明日我哋要去超巿買定哋食物至得囉!”“點解啊!”“驚示威啲人殺入唐人街囉!”八妻係“杞人憂天”。八友怕嘅係另外一件事,就係紐約華裔警察梁彼得開槍誤殺黑青事件。梁警係啱啱喺學堂出來,被派到“紅蕃區”,今次仲摸黑上政府樓,新丁出更,唔手心冒汗就假。錯誤時間出現喺錯誤地點,如此這般,不幸事件就咁發生。依家不但警察總局長布萊頓成為砲轟對象,梁警更遭到質疑同攻擊。因此,往後華人會唔會受到牽連,成為被攻擊對象呢?唔到我哋唔諗也。記得丁勤時1990年出任紐約巿長後不久,因為布碌侖有一韓裔超巿“得罪”了黑人顧客,遭黑人連群結隊喺門外抗議示威,搞到該超巿冇啖好食,瀕臨關門。何以小事引起黑人長期示威?有人話佢哋認為有自己族裔當巿長,可以威威囉!“種族問題何時了?”係美國最頭痛之事。

欢迎提供新闻线索: Email:news@chinapress.net MSN:nychinapress@hotmail.com QQ:2289914185